Ижтимоий тармоқларда Наманган вилояти Косонсой туманида номаълум маҳлуқ пайдо бўлгани ҳақида турли-хил видеолар айланиб юрибди. Одамлар уни 2 метрга сакрай олишини айтган. Шунингдек, бу “маҳлуқ” ҳали ҳеч кимга зарар келтирмаган. У фақатгина аёлларнинг ички кийимларини олиб қочгани маълум.

Ушбу ҳолат бўйича Косонсой тумани ҳокимлиги ахборот хизмати 20 август куни баёнот берган:

Ваҳима ва миш-миш мутлақо бехабарлик ортидан пайдо бўлади.

Сўнгги кунларда Косонсой тумани Ҳуррият маҳалласида қандайдир номаълум шахс кечалари фуқаролар тинчини бузиб, уларни қўрқитиб юргани, уни ушламоқчи бўлишганида томда қочиб кетгани, у жуда ҳам кучли ва чаққон, ҳаттоки тўрт оёқда юриши ҳақида миш-мишлар тарқалмоқда.
Бунинг натижасида бир неча кундан бери аҳоли тинчи бузилган. Ҳаттоки аёллар ва болалар кечаси кўчага чиқишга қўрқиб қолишган. Ачинарлиси ҳақиқатга тўғри келмайдиган, асоссиз миш мишлар яшин тезлигида бутун туман бўйлаб тарқалиб кетди.

Айни дамда туман ИИБ томонидан суриштирув ишлари олиб борилмоқда ва бу суриштирувлар натижасида шу аён бўлдики шов шувларга сабаб бўлаётган бу ғайритабиий мавжудот эмас. Олинган излар бу одам эканлигини кўрсатмоқда. У ҳозиргача ҳеч қандай жиноий иш (ўғрилик, қотиллик, шикаст етказиш….) қилмаган. Шундай экан ортиқча ваҳима ва қўрқувга ҳожат йўқ.

Эслатиб ўтамиз, аҳоли орасида ваҳима чиқаришга қаратилган маълумотлар ва материалларни ҳар қандай шаклда тарқатиш 66 млн 900 минг сўмдан 89 млн 200 минг сўмгача миқдорда жарима ёки 3 йилдан 5 йилгача озодликни чеклаш ёхуд 3 йилдан 5 йилгача озодликдан маҳрум қилиш билан жазоланади, дейилган хабарда. 

Эътиборлиси, орадан 15 кун ўтди. Видео ҳам 15 кун ўтиб кенг оммага тарқалиб кетган.