IMEI кодни рўйхатдан ўтказишни текин қилиш ҳақидаги жамоатчилик мурожаати «Менинг фикрим» порталида керакли овоз тўплаганига қарамай, бир йилдан буён эътиборсиз қоляпти. «Бу қандай парламент бўлдики, ўзи тасдиқлаган ҳужжат ижросини таъминлай олмаса?» дея савол қўйди блогер Хушнудбек Худойбердиев.

Бундан роппа-роса 1 йил аввал «Менинг фикрим» порталида ИМЕИ кодларни рўйхатга олишда тўлов ундиришни бекор қилиш бўйича петисия эълон қилинган эди. Мазкур петиция бор-йўғи 3 соат ичида керакли овоз (10 минг)ни тўпланганди. Бугунга келиб бу овозлар сони қарийб 25 мингга яқинлашди. 

Жамоавий мурожаатнинг сўров қисмида аниқ ва тиниқ қилиб «ИМЕИ кодларини рўйхатга олишда тўловларни бекор қилинишини сўрайман» деб ёзиб қўйилган.

Олий Мажлис Қонунчилик палатаси Кенгаши ва Олий Мажлиси Сенати Кенгашининг қўшма қарори билан тасдиқланган низом талабига кўра, Парламент ва Ҳукумат номига йўлланган мурожаат камида ўн мингта қўллаб-қувватловчи овозни олганда у белгиланган тартибда кўриб чиқилиши ҳамда мурожаатни кўриб чиқиш натижалари бўйича қабул қилинган қарор модератор томонидан 60 кундан ошмаган муддат ичида «Менинг фикрим» веб-порталига жойлаштирилиши лозим.

Aммо орадан 365 кун ўтган бўлса-да, мурожаат ҳамон «Кўриб чиқиш жараёнида»  турибди.

Бу қандай Парламент бўлдики, айнан ўзи тасдиқлаган, юридик кучи бўйича қонунга тенг ҳужжатнинг ижросини таъминлай олмаса?!

Нега минглаб фуқароларнинг ҳақли эътирозларига сабаб бўлаётган, халқ учун эмас фақат маълум идораларнинг манфаатлари учунгина амал қилиб турган бу тартибни бекор қилиш чоралари кўрилмади?

Эртага тушунмовчилик бўлмаслиги учун аниқлаштираман: гап ИМЕИ тизимини бутунлай бекор қилиш ҳақида кетмаяпти, чунки бу тизим орқали қора бозорга анча чек қўйилди (100% бўлмаса ҳам), расмий сотув кўпайди ва ўз-ўзидан давлат бюджетига жуда катта миқдорда солиқлар тушишни бошлади. Шу сабабли бу тизим қолиши тарафдориман, фақат рўйхатдан ўтказиш БЕПУЛ, мантиқий ва ортиқча бюрократиясиз бўлсин.

Энди Сизларга савол, ҳурматли СЕНAТОР ва ДЕПУТAТЛAР: чегарачи, божхоначи ва солиқчилар ўз ишини эплолмаётгани учун, яъни ноқонуний телефонлар кириб келишини олдини олишолмаётгани учун ўйлаб топилган УЗИМЕИ тизими нега халққа пуллик бўлиши керак? Нега?! Ҳукумат ҳам бюджетга юз миллиардлаб солиқ туширсин, ҳам халқдан юз миллиардлаб тўлов (бу ҳам солиқ аслида) ундирсинми? Яхши бузоқ иккита сигирни эмади, деганими бу? Сизнингча, шу адолатданми?

Кўзбўямачилик учун очилган «Менинг фикрим» порталининг нима кераги бор унда? Барибир Парламент у ердаги масалаларни ҳал қилишни эплолмаётган бўлса?

Хуллас, ўтган йили масъулларга қарата айтган гапларим яна қайтараман:

«Aгар Сизга жамоатчилик фикри қизиқ бўлса, унда тўловларни бекор қиласиз. Aгар Сизга жамоатчилик фикри мутлақо қизиқ бўлмаса, унда билганингизни қилаверинг!»