» » Сохталаштириш, нохолис диктант ва «толкачлар» — мактаблар рейтинги қандай тузилди?

Сохталаштириш, нохолис диктант ва «толкачлар» — мактаблар рейтинги қандай тузилди?

 Хабарингиз бор, 30-август куни илк бор республикамиздаги умумтаълим мактаблари рейтинги эълон қилинди. Аммо Ўзбекистон Республикаси Бош вазири ўринбосари Азиз Абдуҳакимов бошчилигида ўтказилган видеоселектор йиғилишида маълум қилинишича, мактаблар рейтингини аниқлаш жараёнида сохталаштириш ҳолатлари учраган.

Вазирлар Маҳкамаси ҳузуридаги Таълим сифатини назорат қилиш давлат инспекцияси бош бошқарма бошлиғи Аюбхон Раджиев таълим муассасалари рейтингининг асосий мақсадларидан бири — ўқувчилар билимини баҳолаш халқаро дастурларида мамлакатимизнинг ижобий иштирокини таъминлашга тайёрлаш эканлигини таъкидлар экан, рейтинг натижаларини обективлиги ва шаффофлигини таъминлаш Таълим инспекцияси олдидаги энг муҳим вазифа эканини маълум қилди.

А.Раджиев томонидан ушбу муҳим вазифани ижросини таъминлаш жараёнида аниқланган айрим нохолис ҳолатлар келтириб ўтилди.

Ишчи гуруҳлар томонидан жойларда ўтказилган назорат ишлари вақтида математика фанидан берилган саволлар китобини сохталаштириш (нусхалаш) ҳамда штрих ишлатиш ҳолати аниқланган, булар: Қашқадарёда 2 та мактабда, Жиззахда 1 та мактабда ва Наманганда 1 та мактабда аниқланган.

Бундан ташқари, Қашқадарёда 6 та, Фарғонада 6 та, Навоийда 5 та, Сурхондарёда 5 та, Наманганда 4 та, Бухорода 3 та, Хоразмда 3 та ва Андижонда 1 та ҳолатда назорат иши ўтказилаётган синфга ўқувчининг ўрнига бошқа ўқувчи яширинча киритилганлиги маълум бўлган.

Олий таълим муассасаларидан ва улар қошидаги Академик лицейлардан она тили ўқитувчиларини 9-синф ўқувчилари билан диктант ёздиришга ва текширишга жалб қилинган. Айрим вилоятларда диктант материалларини нохолис текширилганлиги оқибатида ўқувчиларнинг ўзлаштириш (10-20%) ва сифат (15-25%) кўрсаткичлари сунъий равишда ошиб кетганлиги аниқланди.

Жумладан, Хоразмда 21,6/24,6 фоиз, Фарғонада 17,7/22,7 фоиз, Андижонда 14,5/18,4 фоиз, Тошкент шаҳрида 13,8/15,4 фоиз, Навоийда 11,2/14 фоиз нохолис баҳолашлар қайд этилган.

Бунинг оқибатида рейтингда қатнашган барча 956 та мактабларга тегишли назорат ишлари Давлат инспекциясида қайтадан текшириб чиқилди.

Йиғилишда Ўзбекистон 2021 йилда Иқтисодий ҳамкорлик ва тараққиёт ташкилоти (ОЕКД)нинг таълим сифатини баҳолаш бўйича ПИСА (15-16 ёшли ўқувчилар билимини баҳолаш бўйича халқаро дастур) халқаро тадқиқотларида иштирок этиши таъкидланиб, юқоридаги каби нохуш ҳолатлар ушбу синовлар жараёнида ҳам кузатилса мамлакатимиз улардан четлаштирилиши маълум қилинди.

Якунда ҳудудий халқ таълими бошқармалари раҳбарлари ва умумтаълим мактаб директорларига келгусида бу каби ҳолатларга йўл қўймаслик ҳамда мактаблардаги мавжуд камчиликларни сохталаштириш орқали эмас, балким таълим сифатини ошириш йўли билан ҳал қилиш вазифаси топширилди.

скачать dle 12.0

Хабар ва янгиликлардаги маълумотлар учун муаллифлар жавобгар. Сайт таҳририят муаллифлигидаги материаллардан бошқа хабарлар учун жавобгарликни зиммасига олмайди!

Фикр қолдириш

Кликните на изображение чтобы обновить код, если он неразборчив