Сим тўсиқ ўралган жанг майдони. Рақиблар бир-бирини куракда турмас сўзлар билан ҳақорат қилмоқда. Ташқаридан “уни янчиб ташла”, деган ҳайқириқлар эшитилади. Ва кутилгандек жанг бошланди. Майдондаги икки мушакдор киши вазифасига кўра бир-бирини юзинг, кўзинг демасдан аёвсиз зарбалар билан “сийлашга” тушди.  

Мулоҳазамизни спорт тури дейишга тил бормас бўлган ММА ҳақида юритмоқчимиз.

Спорт иродани тоблайди, интизом ва мақсад сари етаклайди. У чин маънода соғлом ҳаёт, гўзаллик яратувчиси. Шу ўринда айтганда рақибини аёвсиз уриб-тепиб ғалаба қозониш “санъатини” спорт тури десак бўлармикин? Кимгадир тан жароҳати етказиш, уриб майиб қилиш ва умрига зомин бўлишдек ўйин турини сиз нима деб атаган бўлардингиз?

Ижтимоий тармоқларни кузатсангиз бу спорт эмас вахшийликнинг ўзи эканлигига амин бўласиз. Ачинарлиси, ушбу ўйинда аёлларнинг ҳам иштирок этаётганлиги.     

Рақибларнинг олишуви гўёки қадимги Римда уюштирилган гладиаторлар жангига ўхшайди. Нафсига қул кимсалар томонидан ташкил этилаётган бу каби ўйинлардан инсон зоти қандай ижобий фазилат ўзлаштириши мумкин? Қолаверса, муқаддас динимизда ҳам ҳар қандай зулм, зўровонлик қатъиян ман этилади.

Хуллас, спорт инсонийликка мос бўлсин. Нафис ҳаракатларни ўзига сингдирган бадиий гимнастика, шижоат ва чиройли ҳатти-ҳаракатларни намоён этадиган футбол, хоккей, теннис, сузиш ва бошқа ўйин турлари каби одамлар спортчининг маҳоратидан завқлансин. Иқтидорига таҳсин айтсин.

Абдуғаффор АБДУРАҲМОНОВ,

“Юксалиш” умуммиллий ҳаракати

Жиззах вилояти ҳудудий бўлинмаси координатори.