Туркияга яна табиий офат ёпирилди: Уйлар осмонга “учди” (видео)
20 апрель куни Туркиянинг Қаҳрамонмараш вилоятида бўрон содир бўлиб, 40 га яқин одам жароҳат олди. Бу ҳақда Қаҳрамонмарашда зилзила қурбонларига ёрдам кўрсатиш бўйича саъй-ҳаракатларни мувофиқлаштирувчи вилоят губернатори Булент Текбийийк ўғлу маълум қилди.
“Гап 40 нафар жароҳатланганлар ҳақида кетмоқда, улардан 8 нафарининг аҳволи оғир. Зилзилада бошпанасиз қолганлар учун ўрнатилган 170 та контейнер-уйни довул учириб юборган. Биз одамларни кун давомида бошқа контейнерларга жойлаштиришни режалаштирмоқдамиз”, дейди Текбийийк ўғлу.
Унинг сўзларига кўра, бўрон автомобилларни, контейнер-уйларни ағдариб юборган, уйларнинг томларини юлиб, юзлаб метрлар нарига олиб кетган.
Айниқса, февраль ойидаги зилзилалардан бирининг эпимаркази бўлган Пазарчик аҳоли пункти ёмғир билан бирга келган бўронли шамолдан кўп зарар кўрган.
