ДХА Жиззах вилоят бошқармасининг расмий муносабати

ДХА Жиззах вилоят бошқармасининг расмий муносабати

“Jizzaxliklar” телеграм каналида эълон қилинган “Жиззах шаҳар ФҲДЁ бўлимида 3 кундан бери туғилганлик тўғрисида гувоҳнома олиш учун навбатдамиз” деб номланган пост юзасидан қуйидагилар маълум қилинади.                                          


Жиззах шаҳар ФҲДЁ бўлимидаги вазият Давлат хизматлари агентлиги Жиззах  вилоят бошқармаси томонидан ўрганилди.

Мазкур ҳолат юзасидан фуқаронинг шахсига аниқлик киритилганда, вазият бугун 6 июль куни эмас, балки кеча душанба 5 июль куни бўлганлиги аниқланди. Маълумки, душанба фуқаролар мурожаати бошқа иш кунларига қараганда ортган ҳамда навбат кутиш ҳолатлари кўп кузатиладиган ҳафта куни ҳисобланади. Фуқаронинг мурожаати навбати етганда қарийб 10 дақиқа ичида ҳал бўлган ва фарзандининг туғилганлик тўғрисидаги гувоҳномаси расмийлаштириб берилган.

Маълумот учун, бугун фуқаролар томонидан 60га яқин мурожаатлар келиб тушган бўлиб, уларнинг 37 таси туғилганлик тўғрисидаги гувоҳнома олиш билан боғлиқ. Шунингдек 6 та никоҳ расмийлаштирилган ва 11 та фуқародан  никоҳдан ўтиш учун ариза олинган.

Шунингдек, 1 июндан ФҲДЁ бўлимларида экстерриториал тамойил, яъни рўйхатда турган жойингиздан қатъий назар исталган ФҲДЁ бўлимига мурожаат қилган ҳолда никоҳ, туғилишни қайд этиш, ажрим ва ўлим ҳаракатларини расмийлаштириш  имконияти йўлга қўйилган бўлиб, ҳозирда Жиззах шаҳридаги туғруқ комплексларида туғилган болалар учун гувоҳнома олиш, никоҳни қайд этиш учун фуқаролар оқими кўпайган.

Айни пайтда Жиззах шаҳар ФҲДЁ бўлимида мудира лавозими вакант. Жиззах шаҳар ФҲДЁ бўлими мудири (мудираси) лавозимига танлов эълон қилинган ва танловдан ўтган номзод бўлим мудирлигига тайинланади.

Шунингдек, мазкур ФҲДЁ бўлимида ҳозирда шароитлар етарли эмаслиги муносабати билан бино жорий йилнинг III-чорагида тўлиқ жорий таъмирлашдан чиқарилади ва замонавий, барча қулайликларни ўзида мужассам этган ҳолда фуқароларга етарли шароитлар яратиб бериш режалаштирилган.

Ҳурматли фуқаролар!

Соҳага оид саволлар, эътироз ва таклифлар билан @DxaJizzaxBot телеграм боти, 1148 ишонч телефони ҳамда  www.davxizmat.uz расмий веб-сайт орқали мурожаат қилишингиз мумкин.

Келтирилган ноқулайликлар учун фуқаролардан узр сўраймиз!

ДХА Жиззах вилоят бошқармаси Ахборот хизмати