Мудира никоҳни бекор қилиш тартиби ҳақида маълумот берди

Мудира никоҳни бекор қилиш тартиби ҳақида маълумот берди

Арнасой туман ФҲДЁ бўлими мудираси Гавҳар Умурзоқова – ФҲДЁ органлари орқали никоҳни бекор қилиш тартиби ҳақида маълумот берди.

Арнасой туман ФҲДЁ бўлими томонидан 2021 йил 7 ойи давомида 22 та никоҳдан ажралганлик ҳақида далолатнома ёзуви қайд этилган бўлиб, шундан 7 таси ФҲДЁ бўлими орқали, 15 таси суд қарорига асосан қайд этилган. Ажримлар сонининг 5 таси июль ойига тўғри келади.

Фуқаролар Шайимов К.А ва Шайимова (Бакирова) Р.Т (фамилиялар ўзгартирилган) ларнинг никоҳ тузилганлиги ҳақидаги далолатнома ёзуви 2009 йилда қайд этилган бўлиб, фарзандсизлиги сабабли 2021 йил 9 февралдаги никоҳдан ажралиш ҳақида биргаликда берган аризасига асосан 2021 йил 10 май куни Арнасой тумани ФҲДЁ бўлими томонидан ажрими қайд этилган. 

ФҲДЁ органларида никоҳни бекор қилиш (ажрашиш) қуйидаги барча шартлар мавжуд бўлганда амалга оширилади:

  • эр ва хотиннинг никоҳни бекор қилишга ўзаро розилиги;
  • умумий вояга етмаган болаларнинг мавжуд эмаслиги;
  • мулкий низоларнинг мавжуд эмаслиги.

Никоҳни бекор қилишнинг ушбу усулини  барча мавжудлари ичида “энг осони” дейиш мумкин.

Бу ҳолатда никоҳни бекор қилишни рўйхатдан ўтказиш эр-хотиннинг қўшма аризасига асосан улардан бирининг яшаш жойи бўйича ФҲДЁ органи томонидан амалга оширилади. Амалиётда шундай бўладики, эр-хотиндан бири бирор бир сабабга кўра қўшма ариза бериш учун ФҲДЁ органига кела олмайди. Бу ҳолатда бундай аризани эр-хотин номидан уларнинг бири томонидан берилиши мумкин. Ҳозир бўлмаган эр (хотин)нинг аризадаги имзоси нотариус ёки эр (хотин)нинг яшаш жойи бўйича ФҲДЁ органи мудири томонидан тасдиқланиши даркор.

Аризада ажрашишга ўзаро розилик, вояга етмаган болаларнинг йўқлиги, шунингдек эр (хотин) никоҳни бекор қилиш кунида ФҲДЁ органига кела олмаса, никоҳни бекор қилишни  эр (хотин) ҳозир бўлмаганда рўйхатдан ўтказишга розилиги тасдиқланади.

Бунда ФҲДЁ органлари тегишли органлардан вояга етмаган болаларнинг йўқлигини тасдиқловчи ҳужжатларни сўраб олиши мумкин.

Агар эр-хотиндан бири ўзининг никоҳгача бўлган фамилиясига қайтмоқчи бўлса, бу никоҳни бекор қилиш тўғрисидаги аризада кўрсатилиши керак.

Ҳозирги вақтда амалиётда айрим ФҲДЁ органлари ажрашаётган эр-хотиндан маҳалла қўмитасининг яраштириш комиссияси далолатномасини тақдим этишларини талаб қилмоқда.  Бироқ Оила кодексида ҳам, Фуқаролик кодексида ҳам, Фуқаролик ҳолати далолатномаларини қайд этиш қоидаларида ҳам ФҲДЁ органларига бундай ҳужжатни тақдим этиш кўзда тутилмаган.  

Бироқ ФҲДЁ органлари фақат эр-хотинга оилани сақлаб қолиш учун бундай комиссияга мурожаат қилишни тавсия қилишлари мумкин, у ерга мурожаат қилиш ёки мурожаат қилмаслик – эр-хотиннинг шахсий иши.

Никоҳни бекор қилишни рўйхатдан ўтказиш ФҲДЁ органига ариза берилган кундан эътиборан 3 ой ўтгандан кейин эр-хотин ёки улардан бири ҳозир бўлганда амалга оширилади ва собиқ эр-хотиннинг ҳар бирига никоҳ бекор қилинганлиги тўғрисидаги гувоҳнома берилади. Уч ойлик муддатга ярашиш учун берилган муддат деб қараш мумкин. Бу муддатда эр-хотин вазиятни обдон ўйлаб олишлари ва баҳолашлари мумкин: ҳақиқатан ҳам улар ажрашишмоқчими? Бир томондан, баъзиларга ажрашишни расмийлаштириш 3 ойга чўзилиши ёқмас,  айниқса улар биргаликда ҳаёт кечиришни хоҳламасалар. Бошқа томондан – баъзан бу муддат ҳақиқатан   ҳам эр-хотинга муносабатларини тиклашга ва хато содир этмасликларига ёрдам беради. Уч ойлик муддат ўтгандан сўнг эр-хотиндан бири ФҲДЁда никоҳни сақлаб қолиш истагини билдириб, ажрашишни хоҳламаслигини изҳор қилса, никоҳни бекор қилиш рад этилади.

Никоҳни бекор қилиш рўйхатдан ўтказилгандан кейин никоҳ тузиш тўғрисидаги гувоҳномага у бекор қилинганлиги тўғрисида қайд киритилади. Шундан кейин гувоҳнома ариза берувчиларга қайтарилади.

Ўзаро келишувга кўра никоҳни бекор қилишни рўйхатдан ўтказишда давлат божи ундирилади, унинг миқдори ЭКИҲнинг 150%ини ташкил қилади. Шунингдек, ЭКИҲнинг 15%и миқдорида герб йиғими тўлаш лозим бўлади. Қайд қиламизки,  гербли гувоҳномалар  бланкалари қатъий ҳисобда турадиган  ва Адлия вазирлиги томонидан тасдиқланган ягона намуна бўйича ҳимояланганлик даражасига эга махсус қоғозларда тайёрланадиган ҳужжат ҳисобланади.   

ДХА Жиззах вилоят бошқармаси Ахборот хизмати