Aндижонда ўқувчиларни қалин кийимларсиз совуққа олиб чиққан раҳбарлар ишдан олинди

Aндижонда ўқувчиларни қалин кийимларсиз совуққа олиб чиққан раҳбарлар ишдан олинди

Андижондаги 43-умумтаълим мактаби директори ва мактабнинг маънавий-маърифий ишлар бўйича директор ўринбосари эгаллаб турган лавозимидан озод этилди. 

Aндижон вилояти Халқ таълими бошқармаси 23 ноябрь «Андижонда мактаб ўқувчилари курткасиз ташқарига чиқишга мажбур бўлади» сарлавҳаси остида тарқалган хабарга расмий муносабат билдирди.

Маълум қилинишича, 19 ноябрь куни Aндижон шаҳридаги 43-умумтаълим мактабига «Янги Ўзбекистон — янгича дунёқараш» шиори остида зиёлилар, санъат, фан-маъданият ходимлари ҳамда фаол нуронийлардан иборат тарғибот гуруҳи келган.

Тарғибот гуруҳи вакиллари ташрифидан хабардор бўлган ўқувчилар соат 11:25 да уларни кузатиш мақсадида йўлакка чиққан. Ўтказилаётган тадбирнинг фотоалбомини яратиш мақсадида маҳалла фаоллари ва мактаб маънавий-маърифий ишлар бўйича директор ўринбосари уларни расмга олган. Ишчи гуруҳ расмдаги болалар билан қилган суҳбатида мана шу суратга олиш вақтида 2–3 дақиқа ташқарида қолганлиги, сўнг устозлари томонидан танаффус вақти тугамасдан соат 11:35 гача синф хоналарига кириши сўралганлиги таъкидланган.

Мазкур суратдаги ўқувчиларнинг ота-оналари фарзандларининг узоқ вақт ташқарида қолиб кетмаганлиги сабабли эътирози йўқ эканлигини маълум қилган.

«Якуний хулосага кўра, ҳар бир ўқувчининг мактабдаги вақтида саломатлиги ва хавфсизлигига кенг жамоатчилик вакиллари, блогерлардан ҳам кўпроқ таълим соҳаси вакиллари жон куйдириши зарур эканлигини ҳисобга олиб, 43-умумтаълим мактаби директори вазифасини вақтинча бажарувчиси (Д.Насирдинов), мактабнинг маънавий-маърифий ишлар бўйича директор ўринбосари (С.Исманова)лар эгаллаб турган лавозимидан озод этилди», дейилади бошқарма хабарида.