Ўзбекистон кейинги расмий учрашувни қачон ўтказади?

Ўзбекистон кейинги расмий учрашувни қачон ўтказади?

Терма жамоамиз ЖЧ саралаш иккинчи босқичидан ўрин олган охирги баҳсни йирик ҳисобда бой бериб кейинги раундга чиқа олмади.
Албатта, натижадан ҳаммамиз хафамиз. Жаҳон чемпионати камида яна тўрт йилга армон бўладиган бўлди. Лекин ҳаёт давом этади. ЖЧ саралаш кейинги босқичига йўл олган жамоалар 2 сентябрдан курашни давом эттиради. Хўш, қолганлар-чи?
Кейинги босқичга ўта олмаган жамоалар орасида Ўзбекистон миллий терма жамоаси ҳам бор. Шундай экан савол туғилиши мумкин, биз кейинги расмий ўйинни қачон ва ким билан ўйнаймиз? Шуниси маълумки, Ўзбекистон МТЖ буёғига фақат Осиё Кубоги-2023га чиқиш учун кураш олиб боради.
Жаҳон чемпионатига саралашнинг навбатдаги раундига Осиёдан 12 жамоа йўл олди ва бу жамоалар автоматик равишда Осиё Кубоги-2023 йўлланмасига эга бўлишди: Сурия, Австралия, Эрон, Саудия Арабистони, Япония, БАА, Жанубий Корея, Хитой, Ироқ, Уммон, Вьетнам ва Ливан.
2023 йил Хитойда ўтказиладиган Осиё Кубогида жами 24 жамоа қатнашишини ҳисобга олсак, буёғига яна 12та жамоани аниқлаб олиш қолади. Демак, мана шу 12та жамоани саралаб олиш учун ОФК саралашни давом эттиради.
Осиё Кубогига саралашнинг бу босқичида 24 жамоа тўрттадан 6 гуруҳга бўлинади. Ҳар бир гуруҳдан биринчи-иккинчи ўрин эгалари, яъни 12та терма жамоа Осиё Кубогига йўлланма олади.
Ўзбекистон 1-саватчада бўлади 
Осиё Кубогининг навбатдаги саралаш ўйинлари 2022 йилнинг февраль ойида старт олади. Бу дегани биз шу йил охиригача бошқа расмий баҳсда майдонга тушмаймиз. Осиё Кубоги-2023 саралаш босқичи қуръасидан олдин жамоалар 6 тадан тўртта саватчага бўлиб чиқилади. Ҳозирча кейинги босқичда ўйнайдиган 24 жамоадан 15 таси маълум. Қолган жамоалар плей-офф баҳсларидан сўнг курашга қўшилади.
Биринчи саватча: Ўзбекистон, Иордания, Баҳрайн, Қирғизистон, Фаластин, Ҳиндистон. 
Иккинчи саватча: Таиланд, Тожикистон, Филиппин, Туркманистон. 
Учинчи саватча: Қувайт, Афғонистон, Малайзия, Сингапур. 
Тўртинчи саватча: Мўғулистон.

 

Муаллиф: Xayrulla Xoliqov