ИИВ «Телеграм»да фуқаролар шахсий маълумотини тўплаб, тарқатмаслик эвазига пул талаб қилаётган шахслар ҳақида огоҳлантирди
“Телеграм” тармоғида айрим шахслар ижтимоий муҳандислик услуби билан фуқаролар шахсий маълумотларини тўплаб, кейинчалик уларнинг шаъни ва обрўсига путур етказувчи “пост”лар кўринишида ижтимоий тармоқларда тарқатмаслик эвазига пул маблағларини талаб қилаётгани кузатилмоқда.
ИИВ ахборот хизмати хабарига кўра, ҳозирги кунда мамлакатда бундай каналлардан бир нечтаси аниқланган бўлиб, уларни юритувчилари хориж давлатларидан туриб фаолият кўрсатишади.
Ички ишлар вазирлиги томонидан ушбу ва бошқа турдаги жиноий фаолият билан шуғулланувчи барча каналлар юритувчиларининг электрон манзиллари аниқланиб, ўрнатилган тартибда хорижий ҳамкорларни жалб қилган ҳолда терговга қадар текширувлар ўтказилмоқда.
Текширув якунлари юзасидан товламачилик қилаётган шахсларга нисбатан қонуний чора кўрилиши айтилган.
“Афсуски, ҳозирги кунда мазкур жиноий каналларни блоклашнинг техник имкониятлари мавжуд эмас. Шунинг учун каналлар номи ошкор этилмайди.
Шу ўринда, фуқароларга шахсий маълумотларни ижтимоий тармоқларга қўймасликни ёки бегона гуруҳ ва каналларга тарқатмасликни, акс ҳолда товламачиларнинг қурбонига айланиши мумкинлигини эслатиб ўтамиз”, дейилади хабарда.