Каттақўрғонлик эркак икки ёш боланинг онаси бўлган хотинини доимо калтаклаб, очлик билан қийнаган. Аёл ўз жонига қасд қилган.
Эр-хотин 2019 йилда турмуш қуришган. Хотинининг молиявий қарамлигидан, шунингдек, Россияга ишлаш учун кетган ота-онасининг йўқлигидан фойдаланиб, эркак доимий равишда унинг шаъни ва қадр-қимматини камситиб келган ва унга жуда қўпол муносабатда бўлган. Ёш аёл оилавий можаролар ҳақида ҳеч кимга айтишга журъат қилмаган ва натижада эри жазосиз қолаверган.
Хотинини уй ишларини қила олмасликда айблаб, эри уни калтаклаб юрган, очлик билан қийнаган. Шафқатсиз муомалага дош беролмай, ўтган йилнинг 19 ноябрида аёл сирка кислотасини ичган. Тиббий ёрдамга қарамай, у вафот этган.
Судда эркак ўз айбини ва хотинининг ўлимига алоқадорлигини бутунлай рад этган. Бироқ, суднинг ихтиёрида тиббий кўриклар натижалари ва гувоҳларнинг кўрсатмалари бўлган, бунинг натижасида эркакнинг сўзлари ҳисобга олинмаган.
Жабрланувчининг онаси куёви қизини доимий равишда калтаклаганини ва “қуллар боласи” каби иборалар билан ҳақорат қилганини айтган. У ҳатто бир марта ёш қизини пичоқламоқчи бўлган, аммо қизи фожианинг олдини олишга муваффақ бўлган.
Айни пайтда марҳумнинг онаси 14 ёшга тўлгунга қадар вояга етмаган набираларининг васийси этиб тайинланган. Эркак 103-модда (ўз жонига қасд қилишга олиб бориш) бўйича 7 йилга озодликдан маҳрум этилган.
Эслатиб ўтамиз, шу йилнинг баҳорида Хоразм вилоятида яшовчи 72 ёшли эркак хотинини жодугарликда айбланиб, болта билан чопиб ташлаган. Аввалроқ эса, бир аёл Самарқанд вилоятининг Дарғом каналида икки нафар фарзанди билан ўзини сувда чўктирган эди.
