Ўзбекистон Республикаси Вазирлар Маҳкамаси 2025 йил 1 январдан бошлаб жисмоний шахсларга сақлаш тақиқланган ёввойи ҳайвонлар рўйхатини тасдиқлаган. Уларни цирк томошалари учун ҳам ишлатиш мумкин эмас.

Вазирлар Маҳкамаси "Ёввойи ҳайвонларни муҳофаза қилиш тартибини такомиллаштириш чора-тадбирлари тўғрисида” қарор қабул қилган. Ҳужжатда 2025 йил 1 январдан бошлаб жисмоний шахсларга ярим эркин шароитда, сунъий равишда яратилган яшаш муҳитида ёки тутқунликда сақлаш мумкин бўлмаган ёввойи ҳайвонлар рўйхати тасдиқланган.

Шунингдек, қарор ушбу рўйхатга киритилган ҳайвонларни юридик шахслар томонидан сақлашни тартибга солади.

Хусусан, келгуси йилдан бошлаб Ўзбекистонда ёввойи ҳайвонларни давлат ва кўчма циркларда (шапито) сақлаш ва уларни цирк томошалари учун ишлатиш тақиқланган.

Рўйхатга киритилган ёввойи ҳайвонлар ҳайвонот боғларида ёки питомникларда (террариум, аквариум, серпентариум ва бошқалар) сақланиши мумкин. Питомниклар юридик шахслар томонидан Экология, атроф-муҳитни муҳофаза қилиш ва иқлим ўзгариши вазирлигининг рухсатномалари асосида белгиланган тартибда ташкил этилиши керак. Шу билан бирга, Ўзбекистон Қизил китобига киритилган ёввойи ва заҳарли ҳайвонлар махсус питомникларда сақланиши керак.

Эслатиб ўтамизки, жорий йилнинг сентябрь ойида Шавкат Мирзиёев ўзбекистонликларнинг уйларида ёввойи ҳайвонларни сақлаш масалаларини ҳал этиш ва қонунчиликдаги мавжуд бўшлиқни бартараф этиш бўйича топшириқ берган эди.