Иқтисодий тадқиқотлар ва ислоҳотлар маркази Шавкат Мирзиёевнинг БМТ Бош Ассамблеясининг 80-сессиясидаги нутқини таҳлил қилиб, унда энг кўп ишлатилган сўзлар ва асосий мавзуларни аниқлади.

Таҳлилга кўра, «мақсад» сўзи Президент нутқида 11 марта тилга олинган ва стратегик йўналишларнинг устувор аҳамиятини ифодалаган. Шунингдек, «глобал» (8 марта), «давлат» (7 марта), «Осиё» (7 марта) ва «Марказий» (6 марта) сўзлари кўп ишлатилган.

Нутқда «янги», «Ўзбекистон», «дунё» ва «ҳаракат» каби атамалар ҳам 6 мартадан қўлланиб, мамлакат ислоҳотлари ва модернизация стратегияси алоҳида урғу билан қайд этилди. Шу билан бирга, «таълим», «транспорт», «сиёсат» ва «шерик» сўзлари 5 мартадан, «платформа» ва «механизм» эса 4 мартадан ишлатилган.

Сўз бирикмалари ичида энг кўп такрорлангани — «Марказий Осиё» (6 марта) ва «доимий ривожланиш» (4 марта). Қўшимча равишда, «Янги Ўзбекистон», «сунъий интеллект», «соғлиқни сақлаш», «хотин-қизлар», «сув ресурслари» каби иборалар 2 мартадан тилга олинган.

Тақсимотга кўра, Президент нутқида Минтақавий ҳамкорлик ва транспорт-экология масалалари 18% ўрин олган. Ёшлар ва маънавият ҳамда ислоҳотларга бағишланган қисми 15%, БМТ ва глобал вазиятга оид мавзулар 12%, хавфсизлик ва гуманитар муаммолар эса 10% улушга эга бўлган.

Фактлардан кўриниб турибдики, нутқнинг марказий нуқтаси — Марказий Осиё интеграцияси ва Ўзбекистоннинг ислоҳотлари, шу билан бирга, жаҳон миқёсидаги хавфсизлик ва гуманитар муаммоларга ҳам эътибор қаратилган. Бу давлат раҳбарининг миллий манфаатлар билан уйғун глобал стратегия юритишга интилишини намоён қилади.