Ҳуқуқни муҳофаза қилиш идоралари ходимлари ижтимоий тармоқларда сохта ютуқ ўйинларини ташкил этиш орқали ўзбекистонликларнинг пластик карталаридан пул ўғирламоқчи бўлган 9 синф ўқувчисини қўлга олишган.
2021 йилнинг 11 ноябрь куни Тошкент шаҳар Чилонзор туманида яшовчига фуқарога Telegram орқали ”сиз пул мукофотини ютиб олдингиз”, деган мазмундаги хабар борган. Хурсанд бўлган эркак пулни олиш учун нотаниш кимсага ўз пластик картасининг рақами ва SMS-хабар орқали юборилган тасдиқловчи кодни айтган.
Натижада Payme иловаси орқали унинг пласти картасидан дастлаб 205 минг сўм, кейинчалик яна 217 минг сўм ечиб олинган. Шундан сўнг номаълум жиноятчи Telegramдаги ёзишмаларни ўчириб ташлаган.
Фирибгарлар тузоғига тушиб қолганини англаб етган фуқаро дарҳол ички ишлар идораларига шикоят билан мурожаат қилган. Мазкур ҳолат юзасидан Жиноят кодексининг 168 (фирибгарлик) моддаси бўйича жиноят иши қўзғатилган.
Тергов давомида аниқланишича, мазкур жиноят 2006 йилда туғилган, Наманган вилоятининг Чортоқ туманида яшовчи вояга етмаган мактаб ўқувчиси томонидан содир этилган.
