Россиялик саёҳатчининг “шаҳарда кинотеатрдан асар ҳам йўқ” деган сўзлари бухоролик кино ихлосмандларини хафа қилган.
Эслатиб ўтиш жоизки, ўтган ҳафтада бир қизиқ воқеа юз берди. Россия фуқароси кинотеатрда янги “Бэтмен”ни кўриш учунгина Ўзбекистонга ташриф буюрган. Украинадаги можаро туфайли бу фильм Россияда намойиш қилинмаган. Журналистлар билан бўлиб ўтган суҳбатда россиялик меҳмон Бухорога боргани, бироқ у ерда “кинотеатрдан асар ҳам йўқ”лиги боис, 450 километр йўл босиб, Тошкентга келганини таъкидлаган.
“Кинотеатрда янги “Бэтмен”ни кўриш учун Ўзбекистонга ташриф буюрган россиялик фуқаро ҳақидаги янгилик бизни таажжубга солди. Меҳмоннинг айтишича, у дастлаб Бухорога келиб, “шаҳарда кинотеатрдан асар ҳам йўқ”лигини кўрганмиш. Унинг сўзларини ёлғон десак, асло адашмаймиз”, - дея ёзилмоқда мактубда.
Қадимий шаҳар аҳолисининг сўзларига кўра, "Бухоро кинотеатри" мамлакатдаги энг машҳур кинотеатрлардан бири бўлиб, у тарихий шаҳарнинг қоқ марказида жойлашган. Бу ерда 700 томошабинга мўлжалланган бешта зал мавжуд бўлиб, янги чет эл кинолари ва миллий фильмлар намойиш этилади. Реконструкция туфайли кинотеатрда техник ускуналар янгиланган, шунингдек, лазерли проекторлар ўрнатилган.
Бундан ташқари, йиллар давомида шаҳарда бир нечта зал ва турли сиғимга эга замонавий кинотеатрларни ишга тушириш ишлари олиб борилган. Натижада, бугунги кунда Бухоро вилоятида жами 20 дан ортиқ кино заллари мавжуд. Улар замонавий акустика тизимига эга рақамли ускуналар ва фильмларни томоша қилиш учун қулай ўриндиқлар билан жиҳозланган.
Таъкидлаш жоизки, 2021 йилда "Ипак йўли дурдонаси" номли Тошкент халқаро кинофестивали доирасида таниқли кинематографлар делегацияси Бухоро кинотеатрларида ҳам бўлиб, шаҳар киноижодкорлари учун яратилган ажойиб шароитлар яратилганини қайд этишган.
"Ниҳоят, агар Googleдан Бухородаги кинотеатрлар ва уларнинг сессиялари бўйича сўров берсангиз, ушбу объектлар ва сессияларига оид барча керакли маълумотлар пайдо бўлади", - дея хулоса қилишди бухороликлар.
