Тожикистон — МДҲдаги уй-жой энг арзон мамлакат, бу ҳақда «Rossaprimavera» мазкур республика статистика агентлиги 7 май куни тақдим этган маълумотларга асосланиб хабар берди.
Тожикистонда уй-жойнинг бир квадрат метри — $350-$500.
Уй-жойнинг бир квадрат метри Қирғизистон ва Ўзбекистонда — $500-800, Қозоғистонда — $1000, Туркманистонда — $1500, дейилади хабарда.
2022 йилнинг 1-чорагида Тожикистонда 250,4 минг кв. метр уй-жой қурилди, бу ўтган йилгига нисбатан 116,7 фоизни ташкил этади.
Ўтган йили Тожикистонда фойдаланишга топширилган уй-жойлар умумий майдони борасида ички рекорд ўрнатилганди — 1,4 млн квадрат метр.
Тожикистон аҳолисини уй-жой билан таъминлашда МДҲнинг бошқа мамлакатларидан ортда қолмоқда. Ҳолат мамлакат аҳолиси сони нисбатан тез ўсаётгани билан ҳам изоҳланади, мустақиллик йилларида Тожикистон аҳолиси 76,6 фоизга кўпайган.
