Инсон ўзи севган иши билан шуғулланганидагина яхши пул ишлаб топиши ҳамда жамиятга ҳам наф келтириши мумкин. Айрим ҳолларда уй бекаларининг хоббиси ҳам уларга мўмай даромад келтирганининг гувоҳи бўламиз. Қуйида ана шундай аёллар ҳақида сўз юритилади.
Жой Мангано
Ушбу аёлнинг тақдири ҳақида “Жой” номли фильм экран юзини кўргандан кейин кенг жамоатчилик у ҳақида маълумотга эга бўлган. Турмуш ўртоғи билан ажрашган Мангано кичкина квартирада уч нафар фарзанди билан ёлғиз қолган. Аввалига иш топишга уринган аёлнинг мушкул вазиятдан чиқишига хаёлига келган ажойиб фикр сабаб бўлган. У сувини сиқиш учун қўллар билан пол латтага тегинишга ҳожат бўлмаган полювгич ўйлаб топган. Орадан бир неча ой ўтиб эса рўзғор буюмлари ўрин олган дўкон очишга муваффақ бўлган. Аммо ушбу бизнесидан деярли даромад келмайди. Шундан кейин аудиториясини аниқлаб, теледўкон билан шартнома тузади. Телеэкран орқали ўз маҳсулотининг афзалликлари ҳақида айтиб берганидан кейин, 18 минг дона полювгич сотиб олинади. Шу йўсинда давом этганидан Жой 2 йил ўтиб йиллик даромади 1 миллион долларни ташкил қиладиган компания эгасига айланади. Бу билан чекланиб қолмаган Мангано уйни хушбўй қиладиган воситалар, қисқичли ва сирпанмайдиган кийим илгичлар ҳамда бошқа керакли буюмларни ишлаб чиқаради.
Ким Левин
Алабамалик Ким Левин турмуш ўртоғи чорва молларини маккажўхори дони билан озиқлантираётганига қараб туриб, хаёлига ажойиб фикр келади. “Агар жўхори донининг устига жилд кийдириб, ундан ёстиқ ясаса, қандай бўларкин?”. Уй бекаси ўзининг биринчи Спа-ёстиқчасини бир неча дақиқа ичида тикиб бўлади ҳамда ундан ўзи фойдаланиб кўради. Маккажўхорили ёстиқчалар бўйиндаги чарчоқ ва зўриқишни бартараф этиб, тинч уйқуга кетишга ёрдам беради.
Кейинроқ Ким ўзининг янги аксессуарини микротўлқинли печда қиздириб олади. Ёстиқча ичидаги маккажўхори хушбўй ҳид таратиб, иссиқни узоқ муддат сақлаб тура бошлайди. Аввалига Ким ўзининг кичик ихтиросини яқинларининг туғилган кунларига совға қила бошлайди. Бироқ ажойиб маккажўхорили ёстиқча ҳақидаги гап-сўзлар тилдан-тилга ўтиб, Кимнинг буюртмалари тобора кўпая бошлайди. Шундан сўнггина, Ким ёстиқчаларни кенгроқ ҳажмда ишлаб чиқариш ҳақида ўйлайди.
Тузилган шартномадан кейин омади келган Левин тушган даромадини маҳсулотини такомиллаштириш ва машҳур бўлишига сарфлаган. Бугунги кунда у миллионлаб маблағ келтирадиган компаниянинг эгаси ҳисобланади. Унинг йиллик даромади 700 миллион долларни ташкил қилади.
Шери Шмелсер
Шерининг фарзандлари тешикли шиппакларни яхши кўрган. Аёл болаларининг пойабзал ларини қизиқарли қилишни истаб, тешикларни турли нарсалар, аввалига гул, кейин тугма ҳамда лойдан ясалган шакллар билан безаган. Бундай пойабзал ларни болалари мактабга кийиб борганидан кейин бошқа ота-оналар ҳам ундан фарзандларининг пойабзалларини шундай безаб беришни илтимос қилган.
Ертўласида ишлаб чиқаришни йўлга қўйган аёл жиббитс деб атаган ижод намунасининг бир донасини 3 долларга сотган. Орадан бир йил ўтиб, дунё бўйича шундай оёқ кийимлардан 8 миллионта харид қилинган. Шмелсер эса ўз маҳсулотини Crocs компаниясига 20 миллион доллар эвазига сотиб юборган.
Татьяна Бакалчук
Уй бекаси бўлган Татьяна ўз хонадонида болаларга инглиз тилидан дарс ўтган. Фарзандли бўлганидан кейин эса уйда ўқувчи қабул қилишнинг иложи бўлмаган. Шунда Татьяна пулсиз қолиб кетмаслик учун нимадир иш қилиши кераклиги ҳақида бош қотира бошлаган. Интернет орқали савдо қилиш Россияда ҳали йўлга қўйилмаган бир вақтда аёл бу ишни амалга оширишга ҳаракат қилиб кўрган. У ҳеч нима ишлаб чиқармаган, шунчаки бир савдогардан олган молларини интернетда сотишга уринган. Турмуш ўртоғи қўллаб-қувватлаган аёл бир йил ўтиб Россиядаги илк онлайн дўкон Wildberries нинг эгасига айланган. “Biznesi.ru” доменидаги энг қиммат компаниялар рейтингидан ўрин олган Бакалчук Bloomberg Billionaires Index маълумотларига кўра Россиянинг энг бадавлат россиялик аёллар Топ 15 рўйхатидан ўрин олган. Унинг молиявий аҳволи 10,1 миллиард долларга баҳоланади.
