Яқинда Инстаграмда  шафқатсизларча ўлдирилган ва дарахтга  осилган  итлар акс этган видео тарқалди. Ҳуқуқни муҳофаза қилиш идораси ходимлари мазкур икки нафар “қаҳрамон”ларни топишган, улардан бири ҳайвонларни қатл қилган, иккинчиси эса жараённи суратга олган. Афсуски, улар арзимас жаримани тўлаб, даҳшатли ишларини давом эттиришлари мумкинлиги айтилмоқда. Энг ёмони – ҳуқуқбузарлардан бири вояга етмаган бола экан. 

Мазкур видео бўйича Телеграмдаги “Эколог.уз” канали фаоллари шов-шув кўтаришган. Улар видеони жойлаштирган шахс билан боғланмоқчи бўлишган, бироқ у Инстаграмдаги саҳифасини ўчириб юборган. Шунда экологлар ҳуқуқни муҳофаза қилиш идораларига мурожаат қилиб, айбдорларни топишни ва уларни қонун олдида жавобгарликка тортишни сўрашган.

Тезкор қидирув тадбирлари давомида маълум бўлишича, Инстаграмдаги мазкур профиль Бухоро вилояти Шофиркон туманида яшовчи 13 ёшли бола – 8 синф ўқувчисига тегишли бўлиб чиқди.

Видеода кўрсатилган ҳолат 2023-йил 22-октябрь куни юз берган. Боланинг қўшниси бўлган эркак катта эҳтимол билан унинг жўжаларини ейиш учун омборхонасига кирган дайди итларни тутиб олган ва жониворларни таёқ билан уриб ўлдирган. Жасадларни эса сим билан дарахтга осиб қўйган. Ўсмир бола эса воқеани видеога олган ва Инстаграмга жойлаштирган.

Итларни Бухоро вилоятининг Шофиркон туманида яшовчи илгари судланмаган 42 ёшли фуқаро ўлдирганлиги аниқланган.

Иккала ҳуқуқбузарга - итларни ўлдирган эркакка ҳам, ўсмирга ҳам маъмурий жазо, яъни жарима тайинланган.

Вояга етмаган боланинг отасига нисбатан ҳам Маъмурий жавобгарлик тўғрисидаги Кодекснинг тегишли моддаси бўйича, яъни болаларни тарбиялаш ва ўқитиш вазифаларини бажармаганлиги учун жазо қўлланилади, шунингдек, у ўспириннинг ҳайвонларга нисбатан зўравонлиги учун жарима тўлайди.