1 июнь болаларни ҳимоя қилиш куни муносабати билан республиканинг барча кинотеатрлари ва ёшлар ижодиёти саройларида болаларга "Парининг совғаси" ва "Қуёш таъми" номли болалар фильмлари бепул намойиш этилади.  

Тошкентдаги миллий кино саройида кино намойишларидан ташқари, анимация қаҳрамонлари иштирокидаги шоу ва ғолиблар учун совринли викториналар ташкил этилади.

Фильмлар ўзбек ва рус кинематографлари билан ҳамкорликда яратилган бўлиб, улар икки тилда намойиш этилади.

"Парининг совғаси" фильмини Россиянинг хизмат кўрсатган артисти, таниқли актёр Фарҳод Маҳмудов суратга олган. Ажойиб картина 6 ёшдан ошган болалар учун мўлжалланган.

"Қуёш таъми" фильми "Спутник Восток Продакшн" кинокомпанияси билан биргаликда оилавий фэнтези жанрида суратга олинган. У Ўзбекистонга қилган саёҳати пайтида ғалати саргузаштларнинг иштирокчисига айланган Москвадан келган оддий оила ҳақида ҳикоя қилади.