Тошкент вилоятининг Далагузар—Назарбек темирйўл кесишмасида юз берган йўл-транспорт ҳодисаси омадли якунланди: ҳеч ким жабрланмади. Бу ҳақда «Ўзбекистон темир йўллари» маълумот тарқатди.

Ҳодиса 2024 йил 15 декабр куни содир бўлган. Маълум бўлишича, Damas ҳайдовчиси ноқулай об-ҳаво шароитида тақиқловчи белгиларга эътибор бермасдан, темирйўлни кесиб ўтишга ҳаракат қилган. Бу вақтда у автомобилни бошқара олмай, темир йўллар ўртасида тиқилиб қолган.

Автомашина эгаси ва яқин атрофдаги ҳайдовчилар машинани чиқаришга уринишган, аммо бунинг иложи бўлмаган. Шу заҳоти юк поезди машинисти рельсда турган машинани кўриб қолган ва шошилинч тормозлаш тизимини фаоллаштирган. Бироқ поезднинг тормоз масофаси узун бўлгани сабабли тўқнашувнинг олдини олиш имкони бўлмаган.

“Ҳодиса натижасида ҳеч ким жароҳат олмади. Бу эса катта ижобий ҳолат,” — дея таъкидлади «Ўзбекистон темир йўллари».

Мазкур ҳодиса ҳайдовчиларга темирйўл қоидаларига риоя қилишнинг нақадар муҳимлигини яна бир бор эслатади. Шунингдек, темирйўл кесишмаларидаги хавфсизликни таъминлаш бўйича чораларни янада кучайтириш зарурлиги кўзга ташланмоқда.