Украина АҚШга 500 миллиард доллар қийматидаги нодир металлар конларини очиб беради. Бу шартнома, уруш натижасидан қатъи назар, АҚШ томонидан тақдим этилган ҳарбий ёрдамнинг бир қисми сифатида амалга оширилади.
Доналд Трамп Fox News’га берган интервюсида бу ҳақда тўхталиб, Украинадаги титан, марганец, темир, мис ва бошқа стратегик хомашё захиралари америкаликлар учун очиқ бўлишини таъкидлади. АҚШ учун, айниқса, титан муҳим ресурс ҳисобланади, чунки у ҳарбий авиация, денгиз кемалари, танклар ва ракеталар ишлаб чиқаришда тенгсиз металдир.
Айни пайтгача АҚШ титан эҳтиёжининг 90 фоизини импорт қилиб келган бўлса, Украинадаги конларни қўлга киритиш орқали бу ресурсга бевосита эга бўлади. Дастлабки ҳисоб-китобларга кўра, фақатгина титандан АҚШ йилига камида 182 миллион доллар тежаши мумкин. Бу эса Украина ресурсларининг Вашингтон учун стратегик аҳамиятга эга эканини яна бир бор тасдиқлайди.
Шартноманинг иқтисодий ва геосиёсий оқибатлари қанчалик катта бўлиши ҳақида ҳозирдан тахминлар билдирилмоқда. Украина ушбу конларни очиб бериш эвазига қандай имтиёзларга эга бўлади? Бу келишув Европа иттифоқи ва Россия учун қандай таъсир кўрсатади? Бу саволлар ҳозирча очиқ қолмоқда.
