1 июнь куни Тошкентдан БААга Жаҳон чемпионати саралаш ўйини учун йўл олган 100 дан ортиқ ўзбекистонлик футбол мухлиси 5 соатдан зиёд вақт давомида Шаржа халқаро аэропортида ушлаб турилди.

Мухлисларнинг сўзларига кўра, улардан анкета тўлдириш, меҳмонхона брон қилингани ҳақидаги ҳужжатлар ҳамда қайтиш чиптаси нусхаси сўралган, аммо ҳужжатлар олиб қўйилиб, расмийлар томонидан аниқ тушунтириш берилмаган.

Журналист Шоҳрух Ҳайдаров маълум қилишича, рейс Шаржа вақти билан соат 06:05 да қўнган, аммо 11:05 га қадар жавоб берилмаган. Айтишича, фақат аёллар ва ёши катта инсонлар ўтказилган, қолган йигитлар эса кутиб қолган.

Шу куни Абу-Даби ва Шаржа орқали учиб келган ўзбекистонлик журналистлар ҳам 8 соатга яқин ушлаб турилган. Журналист Нодирхўжа Йўлдошев бу ҳолатни тасдиқлаган ҳолда, 25–35 ёшдаги эркак туристлар учун шундай муомала мунтазам равишда қўлланилаётганини билдирган.

Унинг таъкидлашича, “Шаржа ва Абу-Даби орқали ўйин куни учмаслик” тавсия қилинмоқда, чунки бу икки аэропортда муаммолар кузатилмоқда. Дубай орқали сафарларда эса ҳозирча бундай ҳолат қайд этилмаган.

Аввалроқ Тошкент шаҳар туризм бошқармаси ўз мухлисларини огоҳлантирган эди. 5 июн куни бўлиб ўтадиган Ўзбекистон — БАА ўйинига 5 мингга яқин мухлис ташриф буюриши кутилса-да, БАА томони фақат 960 нафарга жой ажратган. Шу сабабли, юзага келиши мумкин бўлган хавфсизлик муаммолари ҳақида Ташқи ишлар вазирлигининг Консуллик-ҳуқуқий департаменти махсус баёнот берган.

Ҳолат юзасидан Ташқи ишлар вазирлиги расмий вакили шундай деди:

“Айни пайтда фуқароларимизнинг қонуний ҳуқуқлари ва манфаатларини ҳимоя қилиш учун барча чоралар кўрилмоқда. Абу-Дабидаги элчихона ҳамда Дубайдаги Бош консулхонамизнинг масъуллари БААнинг тегишли идоралари билан доимий алоқада бўлиб, вазиятни енгиллаштиришга интилаётир.”

БАА расмийларига кўра, мамлакатда халқаро тадбирлар муносабати билан хавфсизлик чоралари кучайтирилган ва шу боис аэропортлардаги текширув жараёнлари чўзилаётгани таъкидланган.