Финляндиянинг машҳур Nokia бренди смартфонлар бозорига қайта кириш ниятида. Компания Reddit’даги расмий саҳифасида маълум қилишича, Nokia ўз бренди остида мобил қурилмаларни ишлаб чиқарадиган янги ва йирик ҳамкорни фаол изламоқда.
Бу қарор 2026 йилда HMD Global билан амалдаги лицензия шартномаси тугаши арафасида қабул қилинмоқда. HMD сўнгги йилларда Nokia номидан смартфон ва тугмачали телефонлар ишлаб чиқариб келаётган эди. Бироқ, сўнгги тенденциялардан маълумки, HMD ўз брендини илгари сурмоқда ва Nokia билан ҳамкорлик босқичма-босқич қисқармоқда.
Android Authority нашрига кўра, келишувни узайтириш эҳтимоли жуда паст. Бу эса Nokia'нинг мустақил равишда ёки янги шерик билан бозорга қайтиши эҳтимолини оширмоқда.
Шу билан бирга, мутахассислар Nokia учун бу қайтиш осон бўлмаслигини таъкидламоқда. Бренднинг замонавий ёш фойдаланувчилар орасидаги танилувчанлиги анча суст. Шундай экан, рақобатбардош смартфонлар ва кучли шериксиз бозорда муваффақият қозониш мушкул бўлиши мумкин.
