АҚШ Адлия вазирлиги санкцияга учраган россиялик миллиардер Сулаймон Каримов билан боғлиқ 106 метрли Amadea суперяхтасини кимошди савдосига қўйди. Яхта Калифорниянинг Сан-Диего шаҳрида 2025 йил 10 сентябр куни ёпиқ аукционда сотилади. Унинг тахминий баҳоси 325 миллион долларни ташкил этади, иштирокчилардан 10 миллион долларлик депозит талаб қилинади.
Amadea яхтаси 2022 йилда АҚШ талабига кўра Фижида мусодара қилинган ва Сан-Диегога етказилган эди. Расмий хужжатларга кўра, яхта Каримов ва унинг оиласи томонидан фойдаланилган, унинг дизайни шахсий илтимос асосида ўзгартирилган. Унда пицца печи, курорт, вино ертўласи, омар аквариуми ва 24 каратлик олтин билан безатилган Pleyel рояли мавжуд.
Яхта 6 қаватли бўлиб, 8 кабинага эга. 16 меҳмон ва 36 экипаж аъзосини сиғдира олади. Унинг вертолёт майдончаси, бассейн, спорт зали ва конференция зали ҳам бор.
Каримов Amadea'га эгалик қилишини рад этган. Бироқ АҚШ расмийлари экипаж баёнотлари ва йўловчи рўйхатлари орқали яхтанинг ҳақиқий эгаси айнан Каримов эканини исботлаган. Экипаж аъзоларига ҳатто унинг севимли Nike кроссовкаларини яхтада доим сақлаш буйруқ қилинган.
Яхта расмий равишда Millemarin Investments Ltd. номига ўтказилган ва харидда Imperial Yachts компанияси орқали ҳаракат қилинган. АҚШга кўра, бу структуралар Каримовнинг активларини яшириш учун тузилган.
Бошқа даъвогарлар қаторида “Роснефть”нинг собиқ раҳбари Эдуард Худайнатов ҳам бор эди, бироқ у "фронт" шахс сифатида кўрилди. 2025 йил июлида Нью-Йорк федерал суди яхтани сотишга рухсат берди.
Amadea яхтасининг сотуви санкцияга учраган активларни мусодара қилиш ва улардан фойда олишга қаратилган глобал стратегиянинг бир қисми ҳисобланади.
