Қозоғистоннинг «Қайрат» футбол клуби UEFA Чемпионлар лигасининг гуруҳ босқичидаги ўз майдонидаги ўйинлар учун чипта нархларини ва сотув тартибини эълон қилди. Клуб маълумотига кўра, «Қайрат» — «Реал Мадрид» учрашувига чипталар 23 сентябрь куни соат 17:00 да сотувга чиқади.

Чипталар нархи 30 000 тенгедан (тахминан 690 минг сўм) бошланади, энг қимматлари эса 250 000 тенгегача (тахминан 5,73 млн сўм) етган. Бир киши 2 тадан ортиқ чипта харид қила олмайди. Чипта олиш жараёнида паспорт маълумотлари текширилади. Клуб таъкидлашича, нархлар UEFA билан келишилган ва Чемпионлар лигаси босқичидаги барча уй ўйинлари учун ягона ҳисобланади.

Ташкилотчиларнинг айтишича, бундай нарх сиёсати турнир мақоми ҳамда жамоанинг тарихий ютуғи — илк бор гуруҳ босқичига чиққани — билан изоҳланади.

Эслатиб ўтамиз, «Қайрат» жамоаси Европа Чемпионлар лигаси саралаш босқичининг ҳал қилувчи баҳсида Шотландиянинг «Селтик» клубини мағлуб этган ва ўз тарихида биринчи марта гуруҳ босқичига йўлланма олган.

Мазкур тарихий ўйин 30 сентябрь куни Олмаотадаги «Марказий» стадионида бўлиб ўтади.