Сўнгги 30 йилда жаҳон иқтисодиётида кучлар нисбати жиддий ўзгарди. АҚШ ўз етакчилигини нафақат сақлаб қолди, балки янада мустаҳкамлади. Япония эса катта улушдан маҳрум бўлиб, унинг тарихий рақобатчиси ролини Хитой эгаллади.

АҚШ етакчилигини мустаҳкамлади

1995 йилда Қўшма Штатларнинг глобал ялпи ички маҳсулотдаги улуши 24,41 фоиз бўлган. 2025 йилга келиб бу кўрсаткич 26,84 фоизга етди. Бу АҚШ иқтисодиётининг барқарор ўсишини ҳамда юқори технологиялар соҳасидаги устунлигини кўрсатади.

Япония пасайди, Хитой кўтарилди

90-йилларда АҚШнинг асосий рақиби ҳисобланган Япония улуши 17,72 фоиздан 3,68 фоизга тушди ва 5-ўринга сурилди. Шу билан бирга, Хитой 16,92 фоизлик улуш билан жаҳон иқтисодиётининг иккинчи йирик кучига айланди. Унинг кўрсаткичи 30 йил олдинги Японияни эслатади.

Ҳиндистоннинг янги мақоми

Яқин йилларда Ҳиндистонни кучли учликка кирган ҳолда кўришимиз мумкин. Юртимиздаги ва халқаро таҳлилчилар бу мамлакатнинг юқори суръатларда ўсиши жаҳон иқтисодиётининг янги йўналишини белгилаб беришини таъкидламоқда.

Европанинг улуши камаймоқда

Гарчи Германия, Буюк Британия, Франция ва Италия ҳали ҳам етакчи саккизликда турса-да, уларнинг улуши анча қисқарди. Бу Европа иқтисодиётининг қийинчиликларга дуч келаётганидан далолат беради.