Талабани деразадан улоқтирган педагогика университети декани ўринбосарининг иши судга оширилган. Прокуратура мазкур жиноий иш бўйича айблов хулосасини тасдиқлаган. Бу ҳақда Бош прокуратура хабар бермоқда.    

4 март куни талабани зўрлашда айбланган декан ўринбосари иши бўйича дастлабки тергов якунланган. 8 март куни эркакка нисбатан айблов хулосаси тузилиб, тасдиқлаш учун Яккасарой туман прокуратурасига юборилган. 10 март куни эса прокуратура ишни Яккасарой туман судига жўнатган.

Ушбу даҳшатли воқеа 2021 йилнинг 18 октябрь куни содир бўлган. Учинчи курс талабаси Муштарий Комилова Зулфия мукофотига ҳужжат тақдим этиш учун тавсифнома ва тақриз олиш мақсадида декан ўринбосарининг ёнига борган.

Эркак кутиб туришни сўраган. Қизнинг сўзларига кўра, бошқа одамлар хонадан чиқиб кетишганидан сўнг, декан ўринбосари чарчаганини айтиб, қаҳва тайёрлашни сўраган. Қиз унинг илтимосини бажариш учун орқаси билан ўгирилганида, эркак эшикни ичкаридан ёпиб, чироқни ўчирган. Хавфсираган Муштарий яқин дўсти билан боғланиб, келишини сўраган. Шундан сўнг у хонани тарк этмоқчи бўлган, лекин декан ўринбосари уни ушлаб, хонадаги диванга ётқизмоқчи бўлган.  

Кейинчалик қизнинг айтишича, декан ўринбосарининг қариндошлари ва ишни бости-бости   қилиш учун “университет маъмуриятидан кимлардир” унга босим ўтказмоқчи бўлган.