Давлат тест маркази (ДТМ) жорий йилда ОТМларга кириш учун режалаштирилган тест синовларининг айрим тафсилотлари билан ўртоқлашган. Бу йил абитуриентлар бешта фандан тест топширишади, умумий саволлар сони эса 90тани (ўтган йили 105та эди) ташкил этади. 

Бу йил тўпланиши мумкин бўлган максимал балл - 189 (ўтган йили 280,5 эди)га тенг бўлади.

Учта мажбурий фанлар:

• она тили – ўқитиш тилига қараб ўзбек, рус ёки қорақалпоқ тили

• математика

• Ўзбекистон тарихи

Ҳар бир фанга 10тадан савол берилади, ҳар бир тўғри жавоб учун 1,1 балл ёзилади. Натижада, 30та саволга энг кўпи билан 33 балл тўпланилади.

Қўшимча фанларга келадиган бўлсак, бунда 60 та савол берилади (ҳар бир фан учун 30 тадан). Биринчи махсус фан бўйича ҳар бир тўғри жавоб учун абитуриентга 3,1 балл (максимал балл – 93), иккинчи фан бўйича-2,1 балл (максимал балл-63) берилади.

Олдинроқ ДТМнинг маълум қилишича, тест синовлари натижаларини эълон қилишни уч ҳафтадан бир ҳафтагача қисқартириш режалаштирилган.