Бугун Ўзбекистонда умумхалқ ҳашари ўтказилади. Тадбир арафасида “Маҳалла” жамоат хайрия жамғармаси Республика бошқаруви раиси Дилшод Усмонов шанба кунги умумхалқ ҳашарида иштирок этиш ихтиёрий эканини таъкидлаган. 

Шуни эсда тутиш керакки, ҳеч ким сизни тозалашга, хусусан бирор бир жазо билан таҳдид қилиш асосида мажбур қила олмайди. Агар бундай ҳолатлар бўлса, прокуратура ва Меҳнат вазирлигига мурожаат қилишингиз мумкин.

Адлия вазирлиги аввал ҳам Ўзбекистонда хашарлар фақат ихтиёрий равишда ўтказилишини, улар фақат тегишли ташкилот ҳудудида ташкил этилишини таъкидлаган эди. Ҳашар вақтида қурилиш ёки қишлоқ хўжалиги ишларига мажбурий жалб этиш қатъиян ман қилинган.

Дилшод Усмановнинг айтишича, ҳашар давомида 15 минг гектардан ортиқ ерни ободонлаштириш, 6 минг километрдан ортиқ суғориладиган ариқ ва каналларни тозалаш, 1 миллионга яқин мевали ва манзарали кўчатлар ва 2 миллиондан ортиқ гуллар экиш, 5 мингта кам таъминланган оиланинг уйларини таъмирлаш режалаштирилган.

Бундан ташқари, тўққиз мингдан зиёд кам таъминланган оила ва уч мингдан зиёд ёлғиз кексалар моддий ёрдам олади. Бунинг учун 3 миллиард сўм ажратилади.