Санкт-Петербургликлар одамларга ёнаётган уйдан чиқишга ёрдам берган фаррош учун 30 минг рублдан кўпроқ пул йиғишган. Ўзбекистонликка қаҳрамонлиги учун ўз миннатдорчилигини муниципалитет раҳбарияти ва ватандошлари ҳам билдиришган. 

Ижтимоий тармоқларнинг маълумотларига кўра, бефарқ бўлмаган петербургликлар жасурлиги учун миннатдорчилик сифатида фаррош Олимжон Иброҳимов учун маблағ йиғишни давом эттирмоқдалар.

Аввалроқ, туман раҳбари Сергей Оверчук унга шахсан миннатдорчилик билдириб, мукофот сифатида расм совға қилган эди. Бу расм қаҳрамон учун шаҳар болалари томонидан чизилган. Шунингдек, туман муниципалитетидан фуқарога янги телевизор топширилган. Маҳаллий оммавий ахборот воситаларида унинг ҳаракатларига бағишланган бир қатор мақолалар чоп этилган.

"Дунё" маълумотларига кўра, Ўзбекистоннинг Санкт-Петербургдаги Бош консуллиги ходимлари ва диаспора фаоллари қахрамон билан учрашишган. Маълум бўлишича, у Россияда 2017 йилдан бери оиласи билан яшайди. Унинг иккита катта қизи ва аллақачон набиралари бор. Бугунги кунда у Адмиралтейский туманидаги "Жилкомсервис"да ишлайди.

Шунингдек, у ватандошларига ўз участкасини текшириш пайтида ёнғинни аниқлаганини ва дарҳол қутқарувчиларни чақирганини айтган. Ва у одамларнинг қичқириғини эшитиб, жабрланувчиларнинг ёнига қувур орқали кўтарилган ва у ерда кишиларни пастга йиқилишдан сақлаб қолган. Эшикдан квартирага кириш имконсиз бўлган.

Ўт ўчирувчилар зинапояни юборишган. Қизлардан бири зинадан пастга тушган. Қолган уч киши ва фаррошни автокран ёрдамида туширишган.

Иброҳимовнинг таъкидлашича, бир йил олдин у Россиянинг Шимолий пойтахтидаги Варейская кўчасида бир аёлни ёнғинда қутқарган экан. Маълум бўлишича, у ўтмишда Ўзбекистонда ҳаво-десант кучлари сафида хизмат қилган. Унда жасорат ва инсонларга эътиборни ота-онаси тарбияланган.