Япониянинг собиқ бош вазири Синдзо Абэни ўққа тутган 41 ёшли Тэцуя Ямагами аввалига бошқа одамни ўлдиришни режалаштирганини тан олди.

Kyodo агентлигига кўра, 41 ёшли собиқ ҳарбий денгизчининг нишони аввалига маълум бир диний ташкилот раҳбари бўлган. Ямагамининг сўзларига кўра, у кейинчалик бу диний тузилмага алоқадор деб ҳисоблаган Абэни ўлдиришга қарор қилган.

Ямагами полицияга Абэ гўёки уларнинг оиласи учун ҳалокатли молиявий муаммоларни келтириб чиқарган диний гуруҳга мансублигини айтган.

«Менинг онам ушбу гуруҳга жалб қилинди, катта хайрия қилди, шунинг учун бизнинг оиламизнинг ҳаёти оғирлашиб кетди», – деган у.

Эслатиб ўтамиз, кеча Япониянинг собиқ бош вазири Синдзо Абэ суиқасд натижасида 67 ёшида вафот этди.

Абэ мамлакат ғарбидаги Нара шаҳрида сайловолди ташвиқоти чоғида нутқ сўзлаётганида қўлбола қуролдан унга қарата ўт очилган.

Тэцуя Ямагами воқеа жойида қўлга олинган.

Ўзбекистон Президенти Шавкат Мирзиёев Япониянинг собиқ Бош вазири Синдзо Абэ суиқасд натижасида бевақт вафот этгани муносабати билан Япония Императори Нарухито ва Бош вазири Фумио Кисидага ҳамдардлик йўллади.