Марказий банк матбуот хизматининг маълум қилишича, давлат секторида ойлик иш ҳақи ва пенсиялар, шунингдек, ижтимоий трансфертларнинг оширилиши аҳоли реал даромадларининг 10,7 фоизга ўсишига замин яратди.
Қайд этилишича, аҳоли даромадлари ўсишига мутаносиб равишда истеъмол талаби ҳам ортиб бормоқда, бу истеъмол товарлари ишлаб чиқариш ва чакана савдо айланмасида ўз ифодасини топмоқда. Хусусан, 2022 йилнинг 9 ойида иқтисодиётда истеъмол товарлари ишлаб чиқариш ҳажми 27 фоизга, чакана савдо айланмаси эса 10,8 фоизга ўсган.

Давлат харажатларининг юқори суръатлари, трансчегаравий пул ўтказмалари ва иқтисодиётга кредит киритилиши йил охиригача ялпи истеъмол ва иқтисодий фаолликни қўллаб-қувватловчи омиллар бўлиб қолади.

Иқтисодий фаолиятнинг жорий тенденциялари ва амалга оширилаётган молиялаштириш чора-тадбирларини ҳисобга олган ҳолда, йил охиригача иқтисодий ўсиш прогнозлари юқорига қараб қайта кўриб чиқилади. 2022 йил охирида ялпи ички маҳсулотнинг ўсиши прогноз коридори доирасида 5,2-5,8 фоиз (олдинги прогноз 5-5,5 фоиз эди), дейилади ҳисоботда.