"Дунё бўйлаб" телеканали журналисти Рамина Ягафарова тўсатдан вафот этди. 

Қайд этилишича, Рамина Ягафарова 12 сентябрь куни кечқурун Чилонзор туманидаги хусусий клиникалардан бирида даволанаётган онасини кўриш учун борган. 

Журналист томоғидаги оғриқ сабаб ўзи билан олиб юрган левофлоксацин (антибиотик) таблеткасини ичади. Орадан 10-15 дақиқа ўтиб, уни тутқаноқ тутган ва ҳушини йўқотган. 

Хусусий клиника шифокорлари Ягафаровага биринчи тез тиббий ёрдамни кўрсатган, шундан сўнг уни жонлантириш бўлимига жойлаштиришган. Даво муолажаларидан сўнг у ҳушига келган, аҳволи яхшиланган. 

Бироқ 13 сентябрь куни кундузи аёлда тутқаноқ қайталанган. Тиббий муоалажаларга қарамай, журналист тахминан 17:50 да вафот этган, дейилади Чилонзор туман прокуратураси ахборотида.

Рамина Ягафарова "Дунё бўйлаб" телеканалида рус тилида эфирга узатиладиган "Своими глазами" ҳамда "Актуално" дастурларини олиб борган.

Эслатиб ўтамиз, май ойида “Yoshlar” телеканалининг “Yangi Davr” дастури телебошловчиси, журналист Нозима Маҳмудова операция вақтида вафот этганди.