Самарқандда 305 километр узунликдаги "Тошкент - Самарқанд" пуллик автомобиль йўли лойиҳаси тақдим этилган.
Янги олти полосали йўл Тошкент ва Самарқанд ўртасида бўлган амалдаги трассани бўшаши учун мўлжалланган. Унинг қурилиши президент фармони билан давлат-хусусий шериклик шартлари асосида назарда тутилган.
"Лойиҳа халқаро стандартлар талабларини ҳисобга олган ҳолда ишлаб чиқилган. Шунингдек, барча чорраҳалар ва иншоотлар устида янги кўприклар ва йўл ўтказгичлар қуриш, ақлли транспорт тизимини ўрнатиш режалаштирилган", – дея хабар бермоқда Самарқанд вилояти автомобиль йўллари Бош бошқармаси.
Олти полосали йўлнинг умумий узунлиги 305 километрни ташкил қилади. Йўл қопламасининг халқаро стандартларга мувофиқ юк кўтариш қуввати 13 тоннани, автомобил йўлининг хизмат қилиш муддати эса 25 йилни ташкил этади.
Тошкент – Самарқанд пуллик автомобиль йўли қурилиши натижасида транспорт оқими анча камаяди. Бундан ташқари, янги пуллик автомобиль йўли туманларнинг экологик ҳолатини яхшилашга, йўл ҳаракати хавфсизлигини таъминлашга ва транзит юкларнинг ўтиш тезлигини оширишга ёрдам беради.
Эслатиб ўтиш жоизки, "Тошкент – Самарқанд" пуллик йўлини қуриш лойиҳасининг техник-иқтисодий асосланишини Туркиянинг Proyapı Mühendislik ve Müşavirlik A.Ş. компанияси ишлаб чиқади. Компания ушбу лойиҳани амалга оширишда Ўзбекистоннинг стратегик ҳамкори бўлган Европа тикланиш ва тараққиёт банки (ЕТТБ) томонидан ёлланган.
ЕТТБ лойиҳанинг техник-иқтисодий асосларини ишлаб чиқиш учун 350 минг доллар миқдорида грант маблағларини ажратган. Ушбу маблағлар ҳисобига Австриянинг ILF Consulting Engineers Austria GmbH компанияси лойиҳанинг дастлабки техник ва иқтисодий асосларини ишлаб чиққан.
Тендер якунлари бўйича Proyapı Mühendislik ve Müşavirlik A.Ş. компанияси билан бир миллион евролик шартнома имзоланган.
Мутахассисларнинг таъкидлашича, Тошкент-Самарқанд трассаси бўйлаб соатига 150 км тезликда ҳаракатланаётган автомобиль белгиланган манзилга икки соат ичида етиб боради. Бу амалдаги йўлга параллель равишда ўтадиган бутунлай янгича йўл бўлади.
