Тўрт йил ичида Ўзбекистонда кўмир қазиб олиш бир ярим баравардан кўпроққа ошган.
Кончилик ва геология вазирлиги маълумотларига кўра, 2019 йилда кўмир қазиб олиш 3,8 миллион тоннага, 2023 йилда эса 5,83 миллион тоннага етган.
Экологик жиҳатдан зарарли эканлигига қарамай, кўмир қазиб олишни оширишдан мақсад шуки, нефть ва газ қазиб олиш даражаси пасаяётган бир даврда қисман уларнинг ўрнини босиши зарур.
Эслатиб ўтамизки, ўтган йил кузида Сурхондарёнинг Сариосиё туманидаги Тўпаланг сув омбори юқори қисмида 11 миллион тонна янги кўмир кони топилган эди.
Бундан ташқари, 2023 йил май ойида бўлиб ўтган президент ҳузуридаги йиғилишда кўмир қазиб олишни 5,3 миллиондан 6,5 миллион тоннагача ошириш режалаштирилгани таъкидланган. Бунинг учун “Ангрен” кўмир конига 80 миллион доллар миқдорида кредит ажратиш, “Шаргункўмир” конини фойдаланишга топшириш режалаштирилган эди. Шунингдек, 14 та кўмир конларини фойдаланиш учун хусусий тадбиркорларга берилиши кўзда тутилган.
