Қирғизистон парламенти депутати Эмил Жамгирчиев Салимбойдан Қирғизистондаги "икки дўстини" йўқ қилишга ёрдам беришни сўраган. Бу ҳақда "Кабар" агентлигига берган интервьюсида мамлакат президенти Садир Жапаров маълум қилган.
Эслатиб ўтамизки, Ўзбекистонда Қирғизистон парламенти депутати Эмил Жамгирчиевга қарши чегарани ноқонуний кесиб ўтгани ва фирибгарлик учун жиноий иш қўзғатилган. У Салим Абдувалиевнинг ёнига яширинча бориб, ёрдамчисини ҳам алдаб кетган. Салимбой ҳам Қирғизистон депутати билан учрашганини тасдиқлаган.
Қирғизистон президенти Садир Жапаровдан “Кабар” агентлигига берган интервьюсида халқ вакилининг бундай хатти-ҳаракатларини қандай қабул қилганини сўрашди.
"Менга тақдим этилган маълумотларга кўра, у Қирғизистон-Ўзбекистон давлат чегарасини ноқонуний кесиб ўтган, "Салимбайбача" номи билан танилган жиноий авторитет Салим Абдувалиев билан учрашган ва унга "икки дўст"ни йўқ қилишга ёрдам беришни сўраган. Ушбу ҳолат бўйича терговни Миллий хавфсизлик Давлат қўмитаси (МХДҚ) ходимлари Ўзбекистон махсус хизматлари билан биргаликда олиб боришди. Натижа қандай бўлиши мени ташвишлантиргани йўқ”,- деди қўшни мамлакат раҳбари.
Қирғизистон оммавий ахборот воситалари таъкидлашича, Қирғизистонда "икки дўст" тушунчаси президент Жапаров ва Миллий хавфсизлик Давлат қўмитаси (МХДҚ) раҳбари Камчибек Ташиевни англатади.
