Хотиннинг калтакланишини видеога олган блогерлар томошабинлардан кечирим сўрашган. Видео муаллифлари кишиларнинг эътирози ва изоҳларини эътиборга олиб, гендер тенглиги тўғрисидаги қонунни бузганликларини тан олишган.
Эслатиб ўтамизки, ижтимоий тармоқларда тарқалган видеога кўра, бир эркак ўз хотинининг юзига шапалоқ туширади. Аёл воқеа ҳақида отасига айтиб бериб, қайтиб бормаслигини билдиради. Ота эса қизининг бу ҳаракати оқибатларини ўйлаб кўриб, унинг ўзини айблайди ва эрининг хонадонига қайтиб юборади.
Кейинчалик блогерлар яна бир видео жойлаштириб, ўз томошабинларидан кечирим сўрашган. Улар кишиларнинг эътирози ва изоҳларини эътиборга олиб, гендер тенглиги тўғрисидаги қонунни бузганликларини тан олишган. Қолаверса, улар бундан кейин бу турдаги роликларни суратга олмасликка ваъда беришган.
Блогерларнинг афсусланиши нақадар самимий экани ва “ижодлари” қанчалик хавфли эканини тушунишгани номаълумлигича қолмоқда. Бироқ, ички ишлар идорасининг ундови билан эмас, балким ўзлари шу қарорга келгани албатта қувонарлидир.
Таъкидлаш жоизки, жамоатчиликнинг эътирозларига қарамай, бошқа блогерлар ҳам бундай роликларни суратга олиш ва омманинг эътиборига ҳавола қилишда давом эттиришмоқда.
Ўтган ҳафтада бошқа бир блогер аёлларга нисбатан зўравонликни тарғиб қилувчи видеони жойлаштирган эди. Балким, айнан юқори даражадаги эътибор уларнинг ҳаракатларига туртки бўлаётгандир? Навбатдаги “узр”ларни кутиб қоламизми?
