Ўзбекистонлик цирк артистлари шу кунларда Монте-Карлода бўлиб ўтаётган 46-халқаро цирк фестивалида тишлар билан арқонга осилиш бўйича жаҳон рекордини ўрнатишган.
Бу ерда дунёнинг 16та мамлакатидан юздан ортиқ иштирокчилар ўзларининг энг яхши чиқишларини намойиш этишган.
Рустам Ҳаметов раҳбарлигидаги ўзбекистонлик Disar жуфтлиги цирк фестивалида тишлар билан арқонга осилиш бўйича ноёб чиқишни ажойиб ижро этишган. Натижада Ўзбекистон давлат цирки вакиллари Дарина Матвеева ва Санжар Ҳасанов "Кумуш масхарабоз" фахрий мукофотига сазовор бўлишган.
Бутун зал билан бирга Монако шаҳзодаси ва маликаси уларни олқишлаган.
Бу циркчиларимизнинг жаҳон саҳнасидаги биринчи ғалабаси эмас. Эслатиб ўтамизки, кузда Италияда "Латина шаҳри" халқаро цирк санъати фестивали бўлиб ўтганди. Ҳаво цирк гимнастикачилари – "Осмон фаришталари" триоси Аброр Хуррамов, Динора Йўлдошева ва Абдужалил Жалилов Кристина Воробьёва раҳбарлигида "Уч нафас" номли чиқишлари билан олтин медални қўлга киритишган эди.
