Фарғона вилояти ҳокими Хайрулло Бозоров Қувайт ва Саудия Арабистонига ташрифи доирасида арабистонлик ишбилармонлар билан учрашган. Учрашувларда йирик ишлаб чиқариш-инвестиция лойиҳасини амалга ошириш масалалари, шунингдек, Саудия Арабистонида 100 мингга яқин Ўзбекистонни доимий иш билан таъминлаш имконияти муҳокама қилинган.  

Фарғона делегацияси, хусусан, Саудия Арабистонида яшовчи ва келиб чиқиши асли ўзбек бўлган омадли ишбилармонлар билан учрашган.

Масалан, Vision Ambassadors асосчиларидан бири Осама Қўқоний Фарғонада паррандачилик соҳасида лойиҳани амалга оширишни режалаштирмоқда. Sodiq At-Tijoriya раҳбари Эмет Абдулазиз тўқимачилик соҳасида ҳамкорлик қилиш, Фарғонада ишлаб чиқарилаётган маҳсулотларни Саудия Арабистони бозорига импорт қилиш бўйича таклифлар билдирган. 

Арабистонлик тадбиркор Аҳмад Алхутами билан музокараларда Саудия Арабистонида тил ва турли касбларни ўқитиш марказларини ташкил этиш, шунингдек, 100 мингга яқин фарғоналикларни доимий иш билан таъминлаш масалалари муҳокама қилинган.

Томонлар қўшма ишларни йўлга қўйишга ва яқин келажакда Фарғонада тақдим этилган таклифларни муҳокама қилиш учун яна бир учрашув ташкил этишга келишиб олишган.

Жидда шаҳрида ҳоким электрокомпонентлар, кабеллар ва ярим ўтказгичлар ишлаб чиқарувчи Bahra Electrics компанияси раҳбари Фаҳед Талал Идрис билан музокаралар олиб борган ва Фарғона вилоятида йирик ишлаб чиқариш-инвестиция лойиҳасини амалга ошириш муҳоқамасида иштирок этган. Минтақада мисни чуқур қайта ишлаш ва электр кабелини ишлаб чиқариш бўйича корхона ташкил этиш режалаштирилган.

Эслатиб ўтамизки, йил бошида президент Қатар билан ўзбекистонликларни ишга қабул қилиш бўйича ҳамкорлик тўғрисидаги битимни тасдиқлаган эди. Келишувлар ўтган йилнинг ёзида Самарқандда эришилган.