АҚШ президентлигига номзод Доналд Трампнинг нутқи пайтида отишма содир бўлди. Ўқ сиёсатчининг бошидан бир сантиметр узоқликда ўтиб, қулоғига тегди.

Суиқасднинг оқибатлари

Трампнинг Пенсилваниядаги нутқи пайтида отишма овози эшитилгандан сўнг, сиёсатчи нутқни тўхтатди ва майдончани тарк этди.

Пенсилвания губернатори Джош Шапиро “Ўқ отиш натижасида 50 ёшли эркак ҳалок бўлди", - деди. Ҳалок бўлган 50 ёшли эркак Кори Комператор экан. Эркак собиқ ўт ўчириш бошлиғи бўлган. Хабарларга кўра, митингда отишма пайтида у оиласини ҳимоя қилишга уринган. Унинг иккита қизи қолган. Отишманинг яна иккита қурбони ҳам маълум-уларнинг иккаласи ҳам оғир аҳволда, уларнинг исмлари ошкор қилинмаган.

Томас Мэтью Крукс ким?

Трампга суиқасд қилган шахс воқеадан сўнг деярли дарҳол йўқ қилинган. ФҚБ маълумотларига кўра, жиноятчи 20 ёшли Томас Мэтью Крукс экан. Крукс Трамп чиқиш қилган саҳнадан тахминан 120 метр узоқликда жойлашган ишлаб чиқариш корхонасининг томига чиққан ва президентликка номзодга милтиқдан бир неча марта ўқ узган.

Шунингдек, Трампга суиқасдда гумон қилинган шахс ўқ отиш клубининг аъзоси бўлганлиги аниқланган. Клуб раҳбари буни тасдиқлаган, аммо тергов билан боғлиқ ҳар қандай изоҳ беришдан бош тортган.

"Трампга ўқ отилган қурол қонуний равишда гумонланувчининг отаси томонидан сотиб олинган",- дея таъкидламоқда маҳаллий оммавий ахборот воситалари. Митинг яқинида тўхтаб турган йигитнинг машинасида портловчи мосламалар топилган. Шунингдек, портловчи моддалар ишлаб чиқариш учун материаллар унинг уйидан ҳам топилган.

Федерал қидирув бюроси Трампга ўқ узган одамнинг руҳий муаммолари йўқлигини айтган. "Тергов ҳозирча Томас Мэтью Круксда "ментал характердаги муаммолар" борлигини аниқламаган. Ҳамкасблари уни низосиз йигит деб таърифлашган. Синфдошларининг айтишича, у мактабда таъқибга учраб турган. "АҚШ ҳуқуқни муҳофаза қилиш органлари Трампга митингда ўқ отишда гумон қилинувчининг экстремистик ташкилотлар билан алоқаларини ҳозирча топишмаган", - деди ABC телеканали.

Трампнинг баёноти

Доналд Трамп митингдаги отишмадан кейин ўз жадвалини ўзгартирмайди ва 14 июль куни Милуокига республикачилар партияси қурултойига боради. У бу ҳақда Truth Social ижтимоий тармоғидаги саҳифасида ёзган.

Трамп митинг жойини тарк этгандан сўнг, расмий баёнот билан чиқди ва шундай деди: "Мен АҚШнинг махфий хизматига ва барча ҳуқуқни муҳофаза қилиш органларига Пенсилвания штатининг Бутлер шаҳрида содир бўлган отишмага тезкор жавоб бергани учун миннатдорчилик билдирмоқчиман. Энг муҳими, митингда ҳалок бўлган одамнинг оиласига, шунингдек, оғир жароҳат олган бошқа одамнинг оиласига ҳамдардлик билдирмоқчиман. Бу бизнинг мамлакатимизда содир бўлишига ақл бовар қилмайди. Ҳозирда отишма қилган одам ҳақида ҳеч нарса маълум эмас. Менга ўнг қулоғимнинг юқори қисмини тешган ўқ отилди. Мен нимадир нотўғри эканлигини дарҳол англадим, ҳуштак, ўқ овозини эшитдим ва дарҳол ўқ теримни йиртиб ташлаганини ҳис қилдим. Кўп қон кетди ва кейин нима бўлаётганини англадим. ХУДО АМЕРИКАНИ АСРАСИН!"

Митингдан олдин гувоҳлар томдаги одам ҳақида хабар беришган. ФҚБ бунга муносабат қилмаган.

Шуни таъкидлаш керакки, Трампга суиқасд уюштиришга уринишдан сўнг, бир неча киши ўқ отишдан олдин бир одамнинг бинонинг томига чиқиб олгани ҳақида полиция ва хавфсизлик ходимларига ишора қилган, аммо улар бунга муносабат билдирмаган.

CBS ўзининг жонли эфирида бундай митингларда ҳар доим кучайтирилган хавфсизлик чоралари кўрилаётгани, одамлар металл детекторлар доирасидан ўтаётгани таъкидланди. Бундан ташқари, нима учун қўшни бинонинг томида шубҳали одамни кўрган гувоҳларнинг хабарларига ҳуқуқни муҳофаза қилиш органларининг муносабати бўлмагани аниқ эмас.

Ўзбекистон Президентининг реакцияси

Шавкат Мирзиёев Америка Қўшма Штатларининг собиқ президенти Доналд Трампнинг Пенсилвания штатидаги сайловолди нутқида ҳаётига суиқасд қилгани ҳақидаги хабарни чуқур ташвиш билан қабул қилган. Ўзбекистон президенти ушбу зўравонлик ҳаракатини қатъий қоралаган ва Доналд Трампга тезроқ соғайишини тилаган.

Ўзбекистонликларнинг шарҳлари

Зафар Ҳошимов ўзининг Facebookдаги саҳифасида "Ушбу Америка сайловолди кампанияси туфайли    “Карта уйлари”ни кўришнинг ҳожати йўқ",- деб, бу ҳолат ҳақида қизиқ фикр билдирган ҳамда сиёсий ўйинлар ва суиқасднинг ҳақиқатдан йироқлилига ишора қилган.

Ўқувчилардан бири эса "Шавкат Мирзиёев Доналд Трампга қилинган уринишни қоралаган ҳолда қатъият ва донолик кўрсатди. Бу унинг тинчлик ва хавфсизликка бўлган доимий истагини кўрсатади ва бу албатта ҳурматга лойиқдир", -дея изоҳ қолдирган.