Matiz ҳайдовчисининг машинага миниш учун қўпол “таклифи”га жавобан қиз унга ўрта бармоғини кўрсатган. Суд қизнинг ҳатти-ҳаракатини ҳақорат деб топган ва уни жаримага тортган.
Воқеа тафсилотлари билан гендер зўравонлигига қарши "Nemolchi.uz". лойиҳасининг муаллифлари ўртоқлашган.
27 июнь куни 19 ёшли қиз дугонаси билан йўлдан ўтаётган бўлган. Шу пайтда "Matiz" автомобилида бўлган 40 ёшли Қўшмурод Бобомуродов уларнинг йўлини тўсган ва машинага минишга таклиф қилаверган. Аммо қизлар бир неча маротаба унга рад жавобини беришган. Эркак эса тинчимай, уларни чорлайверган. Шунда қизлардан бири чидай олмаган ва эркакка қарата ўрта бармоғини кўрсатган.
“Бобомуродов Қўшмурод қизларга нисбатан ўта қўпол муомалада бўлган ва уларнинг илтимосига қарамай, ўз ҳолига қўймаган”, - дея маълум қилишмоқда "Nemolchi” муаллифлари.
2024 йилнинг 10 июль куни Жиноят ишлари бўйича Чилонзор тумани суди Бобомуродовни Маъмурий жавобгарлик тўғрисидаги Кодекснинг 41-1 модда (шаҳвоний шилқимлик қилиш)си бўйича айбдор деб топган ва уч суткага қамоқ жазосига ҳукм қилган.
Шу билан бирга, суд эркакка ўрта бармоғини кўрсатган қизни ҳам 183 модда (майда безорилик) бўйича айбдор деб топган ва БҲМнинг 3 баравари – 1020000 сўмга жаримага тортган.
“Шилқимликдан азият чеккан қизни жавобгар қилиш қанчалик тўғри? Ёки ҳуқуқ-тартибот тизимимиз қизлар бу каби “таклифлар”ни бажонидил қабул қилишини кутмоқдами?”, - дея ҳайрон қолишмоқда "Nemolchi" муаллифлари.
Бу каби ҳолатлар натижасида аёллар ҳимоч учун ҳуқуқ-тартибот идораларига умуман мурожаат қилмай қўйишади, чунки шикоятга жавобан қарши айбловга дуч келишлари мумкин.
Эслатиб ўтамиз, жорий йилнинг баҳорида “Яндекс” таксичиси чақирувни бекор қилиш учун аёлдан пул талаб қилган ва у ҳақдаги шахсий маълумотларни ошкор қилиш билан қўрқитган.