ЛДПР (Россия либерал-демократик партияси) депутатлари Давлат Думасига чет эл фуқароларининг рус тилини билиш тўғрисидаги сертификати ҳақиқий эмас деб топилган тақдирда уларни ўз ҳисобидан депортация қилишни назарда тутувчи қонун лойиҳасини киритишган.
Қонун лойиҳасида айтилишича, агар ташриф буюрувчида кетиш учун маблағ бўлмаса, у тегишли мамлакатнинг дипломатик ваколатхонаси ёки консуллик муассасаси ҳисобидан депортация қилинади.
Қонун лойиҳасига тушунтириш хатида таъкидланишича, сўнгги пайтларда сертификат олиш учун рус тили хорижий тил сифатида, Россия тарихи ва Россия Федерацияси қонунчилигининг асослари бўйича имтиҳонларни сохта қабул қилиш ҳолатлари кўпаймоқда.
Муаллифларнинг фикрига кўра, қонуннинг қабул қилиниши рус тили, Россия тарихи ва Россия Федерацияси қонунчилигининг асослари тўғрисида етарли маълумотга эга бўлмаган чет эл фуқароларининг иш билан таъминланишининг пасайишига олиб келади.
ЛДПР раҳбари Леонид Слуцкий “РИА Новости” агентлигига берган интервьюсида уларнинг партиясининг мигрантларга нисбатан позицияси "ўзгармас" эканлигини айтган. Унинг таъкидлашича, Россияга фақат ушбу мамлакатнинг тили ва тарихини ўрганган ва талаб юқори бўлган мутахассислар келиши керак.
"Россияга фирибгарлик билан, жиноятчилик қилишга келиб, ўзларига ҳужжатлар сотиб олганлар бюджетимиз учун ҳеч қандай харажатларсиз дарҳол депортация қилинади. Мамлакатни улардан қутқариш учун ўзлари ёки ватанлари тўлансин. Россияга фақат иқтидорли ва фойдали хорижий ишчиларни киритиш керак. Биз бундай тартибга, шу жумладан қонунчилик даражасида эришишга интиламиз", - деди Слуцкий.
Эслатиб ўтамизки, яқинда ўтказилган сўров шуни кўрсатдики, россияликларнинг 81 фоизи мигрантларга нисбатан салбий ҳис-туйғуларга эга эмас.
