Ўтган йили Ўзбекистонда Маъмурий жавобгарлик тўғрисидаги Кодекснинг кўпхотинлиликни тарғиб қилиш ва жинсий камситишга қарши курашга қаратилган янги моддалари бўйича 21 киши жавобгарликка тортилган.

Икки ёки ундан ортиқ хотин билан бирга яшашни тарғиб қилганлик учун жазо назарда тутилган 47-8-моддага биноан, 13 киши жаримага тортилган, битта ҳуқуқбузар маъмурий қамоққа ҳукм қилинган.

Гендер камситилишига қарши курашга қаратилган 189-2-моддага асосан, 7 киши жавобгарликка тортилган, уларнинг ҳар бирига маъмурий жарима тайинланган.

Ушбу чоралар ўтган йилнинг 31 октябрида "Ўзбекистон Республикаси Жиноят кодексига ва Маъмурий жавобгарлик тўғрисидаги Кодексга ўзгартиш ва қўшимчалар киритиш тўғрисида"ги қонун доирасида жорий этилган.

Жиноят кодексининг 126-моддасига кўра, кўпхотинлилик қуйидаги жазо турларидан бири билан жазоланади:

• базавий ҳисоблаш миқдорининг эллик бараваридан юз бараваригача миқдорда жарима (16,5 миллион сўмдан 33 миллион сўмгача);

• уч йилгача ахлоқ тузатиш ишлари;

• бир йилдан уч йилгача озодликни чеклаш;

• уч йилгача озодликдан маҳрум қилиш.

Эслатиб ўтамизки, Ўзбекистонда 2018 йилдан 2023 йилгача кўпхотинлилик учун 38 киши судланган.