Маъмурий ишлар бўйича Тошкент шаҳар туманлараро суди 2024 йил 19 ноябрда Юнусобод тумани 9-мавзеси 21а-уйда яшовчи аҳолининг даъвосини қаноатлантирган. Судья собиқ "Бедана" кафеси ўрнида 14 қаватли уй-жой мажмуасини қуришни бошлаб берган шаҳарсозлик кенгашининг реконструкция қилиш рухсатномаси ва хулосасини ҳақиқий эмас деб топган.

Шикоят аризаси муаллифлари 21а-уй аҳолиси бўлиб, улар берилган ҳужжатларнинг қонунийлиги текширишни талаб қилган. Суд уларнинг талабларини тўлиқ қондирган.

"Биз ишни холис кўриб чиққани ва адолатли қарор қабул қилгани учун судга миннатдорчилик билдирамиз", - деди ташаббускор гуруҳ вакиллари.

Юнусободнинг 9-мавзесида мажмуа қурилиши лойиҳаси маҳаллий аҳоли орасида кенг шов-шувга сабаб бўлган, улар ўз туманларида кўп қаватли бино қурилишига қарши чиқишган ва уларнинг фаоллиги туфайли ноқонуний қарор ҳуқуқий соҳада бекор қилинган.