Тошкент вилоятининг Паркент туманидаги Красногорск қишлоғида жойлашган Lion Park ҳайвонот боғида фожиа содир бўлди. Соат 5:00 атрофида қафасдан чиққан учта шер 44 ёшли қўриқчига ҳужум қилиб, уни ҳалок қилди.

Прокуратура томонидан тақдим этилган маълумотларга кўра, ҳайвонлар қулфланмаган қафасдан чиқиб кетишган. Ҳайвонот боғи маъмурияти буни соат 9:00 да аниқлаб, шундай ҳолатга қарши чоралар кўришди. Икки шер транквилизаторлар ёрдамида қафасга қайтарилган, учинчи шер эса таклиф этилган овчи томонидан отиб ташланган.

Воқеа ҳақида ваколатли органларга хабар қилинган. Соат 10:00 да ИИБ, прокуратура ва экология бошқармаси ходимлари воқеа жойига етиб бориб, тергов ишларини бошлашди. Қўриқчининг жасади экспертизага юборилди. Шунингдек, ҳайвонот боғидаги барча ёввойи ҳайвонлар қайта санаб чиқилди ва уларнинг барчаси қафасларда экани тасдиқланди.

Lion Park 2019 йилдан бери Ўзбекистондаги биринчи контактли ҳайвонот боғи сифатида фаолият юритиб келади. Унда шерлар, айиқлар ва бошқа ёввойи ҳайвонлар сақланади. Мазкур ҳодиса ҳайвонот боғларида хавфсизлик чораларини кучайтириш зарурлигини яна бир бор кўрсатиб берди.