Google анъанага мувофиқ 2024 йилнинг энг машҳур қидирув мавзуларини тақдим этди. Ҳисоботга кўра, Доналд Трампнинг қайтадан АҚШ президенти этиб сайланиши, Париждаги Олимпия ўйинлари ва машҳур "Дубай шоколади" жаҳонда энг кўп қизиқтирган мавзуларга айланди.

Бундан ташқари, фойдаланувчилар сунъий йўлдош компанияси SpaceX’нинг ютуқлари, тарихий қуёш тутилиши ва глобал сув тошқинлари каби ноёб табиий ҳодисалар ҳақида маълумот олишга фаоллик билан қизиқиш билдирган. Шунингдек, энг ёқимтой бегемот Му Денг ҳам катта эътиборга сазовор бўлган.

Шоу-бизнес соҳасида хонанда Селин Дионнинг саҳнага қайта чиқиши йилнинг энг муҳим воқеаларидан бири бўлди. Кино ва спорт оламида эса актриса Лили Гладстоуннинг “Олтин глобус” мукофотига эришиши, жазоирлик боксчи Иман Хелифнинг можаролари ва Симона Байлзнинг ажойиб гимнастик чиқишлари алоҳида қайд этилди.

Шунингдек, Майк Тайсон ҳақидаги маълумотлар ва Дубай шоколади ҳақидаги қизиқувчанлик йилнинг ўзига хос трендларидан бири бўлди.

Google ҳисоботига кўра, фойдаланувчилар глобал трендлардан бохабар бўлиш учун асосий манба сифатида қидирув тизимидан фойдаланишда давом этмоқда. Бироқ, The Wall Street Journal маълумотига кўра, ёш авлод ахборот олиш учун Google ўрнига сунъий интеллект ва бошқа янги платформалардан фойдаланишга ўтмоқда.