Хитой Ташқи ишлар вазирлиги DeepSeek ва бошқа Хитой компаниялари томонидан махфий маълумотлар яширинча тўпланаётгани ҳақидаги даъволарни рад этди.

Вазирлик расмий вакили Го Цзякунь халқаро майдонда DeepSeek чат-ботига чекловлар қўйилгани юзасидан фикр билдириб, Хитой ҳукумати ҳеч қачон компаниялардан шахсий маълумотларни ноқонуний тўплашни талаб қилмаганини таъкидлади.

"Хитой шахсий маълумотларни ҳимоя қилишга катта аҳамият беради. Биз ҳеч қачон компаниялар ёки жисмоний шахслардан маълумотларни ноқонуний йўллар билан йиғишни талаб қилмаганмиз ва талаб қилмаймиз," — деди дипломат.

Шунингдек, у технологик масалаларни сиёсийлаштириш ва миллий хавфсизлик концепциясини сунъий равишда кенгайтиришга қарши эканликларини қўшимча қилди.

Аввалроқ Италия, Австралия, Ҳиндистон, АҚШ, Япония ва Жанубий Корея расмийлари DeepSeek чат-ботидан давлат ташкилотларида фойдаланишни тақиқлаган эди.

Эслатиб ўтамиз, январь ойи охирида DeepSeek-R1 сунъий интеллект иловаси АҚШ, Буюк Британия ва Хитойда Apple App Store'да энг оммабоп бепул иловага айланган эди. Бу эса технологик гигантларнинг бозордаги котировкаларининг пасайишига сабаб бўлди.