Ўтган йили Ўзбекистон судлари 78 мингга яқин шахсга оид 60 мингдан ортиқ жиноий ишни кўриб чиқди. Суд статистикасига кўра, жиноятларни асосан эркаклар содир этган бўлиб, судланганларнинг катта қисмини ёшлар ташкил этади.
Жиноятчилар профили: ёшлар ва гендер тафовутлари
Олий суд маълумотларига қараганда, 61,5 минг нафар судланганларнинг аксарият қисми – 54,4 мингдан ортиқ киши (88,4 %) эркаклар ҳисобланади. Аёллар эса анча камроқ жиноий жавобгарликка тортилган – 7,1 минг ҳолатни (11,6 %) ташкил қилган холос.
Судланганлар орасида ёшлар сони ҳам анча кўп – 22,8 минг нафарни ташкил қилган, шундан 2,2 минг нафари вояга етмаганлар ҳисобланади. 60 ёшдан ошган шахслар орасидан эса 2,6 мингдан ортиқ киши жавобгарликка тортилган.
Жазо чоралари ва озодликдан маҳрум этиш ҳолатлари
Судлар томонидан 20 мингга яқин шахс озодликдан маҳрум этиш жазосини олган, аммо кўпчилигига бошқа чоралар – жарима, ахлоқ тузатиш ишлари ва шартли жазо тайинланган. Шу билан бирга, 13 мингдан зиёд айбланувчи томонлар ярашгани сабабли жиноий жавобгарликдан озод қилинган.
Асосий жиноий йўналишлар
Судлар асосан қуйидаги турдаги жиноят ишларини кўриб чиққан:
Фирибгарлик
Йўл ҳаракати қоидаларини бузиш
Ўғрилик
Гиёҳванд моддалар билан боғлиқ жиноятлар
Талон-торож қилиш
Ҳужжатларни қалбакилаштириш
Безорилик
Қасддан тан жароҳати етказиш
