Жорий йилнинг январь ойида Ўзбекистонга 1 796 та енгил автомобиль, жумладан, электромобиллар ва гибридлар импорт қилинди. Бу ўтган йилнинг шу даврига нисбатан 5,6 баробар камдир. Импорт ҳажми 221 миллион доллардан 31 миллион долларгача қисқариб, 7,1 баробарга камайган.
Импорт камайишига нима сабаб бўлмоқда?
Иқтисодчи Темурмалик Элмуродовнинг фикрича, бу ҳолат асосан хориждан келаётган автомобиллар учун техник синовлар тартиби ўзгаргани билан боғлиқ. 2023 йил 1 ноябрдан бошлаб транспорт воситалари божхона ҳудудида эмас, балки Тошкент вилояти Пискент туманидаги махсус полигонда текширилмоқда.
Экспертнинг таъкидлашича, полигоннинг қуввати импорт ҳажмини таъминлаш учун етарли эмас. Бу эса:
- Автомобиль етказиб бериш муддатларини узайтиради
- Навбатлар пайдо бўлишига сабаб бўлади
- Импорт машиналар нархининг ошишига олиб келиши мумкин
Ҳукуматнинг позицияси
- Расмийларга кўра, янги тартиб автомобилларнинг хавфсизлигини таъминлашга қаратилган.
- Электрон навбат тизими жорий этилгани навбатлар муаммосини қисман ҳал қилиши мумкин.
- Инвестиция, саноат ва савдо вазирлиги мамлакатда миллий ишлаб чиқаришни қўллаб-қувватлаш мақсадида нотариф чораларни қўллаётганини тан олди.
Импорт электромобиллар учун қўшимча тўловлар жорий этилмоқда
2025 йил 1 майдан бошлаб Ўзбекистонга олиб кириладиган электромобиллар учун утилизация йиғими оширилади. Экспертлар бу ўзгариш электромобиллар импорти ҳажмини янада камайтириши мумкинлигини таъкидлашмоқда.
Маълумот учун: Янги тартиблар жорий этилганидан сўнг ўзбекистонликлар техник текширувдаги навбатлардан норозилик билдирган. Кейинчалик электрон навбат тизими йўлга қўйилган.
