ТОШКЕНТ — Ижтимоий тармоқларда тарқалган видеоларда Тошкентдаги темир йўлда юзага келган ёнғин пайтида “Афросиёб” тезюрар поездига ўхшаш поезд таркиби ёнмоқда, деган таассурот қолдирган ҳолат бўйича "Ўзбекистон темир йўллари" расмий баёнот берди.

Мазкур ҳодиса “Афросиёб” поездлар таркибида эмас, балки манёвр ишларини амалга ошираётган ТЕМ2 туркумидаги дизел тепловозида рўй бергани маълум қилинди. Тезкор чоралар натижасида ёнғин қисқа вақт ичида бартараф этилган, ҳеч ким жабрланмаган ва қурбонлар қайд этилмаган.

“Ёнғин мунтазам рейсдан ташқарида содир бўлган. Вагонларда йўловчилар бўлмаган. Ҳодиса оқибатида ‘Афросиёб’ поезд таркибига ҳеч қандай зарар етмаган ва у ҳаракатини давом эттирган”, — дейилади компания хабарида.

Кейинчалик берилган расмий изоҳга кўра, ёнғиннинг келиб чиқишига тепловознинг тутун чиқариш коллекторида тўпланган қурум ва қатрон сабаб бўлган. Экипаж тезда ёнғинни ўчириш бўйича ҳаракат қилган — ёнилғи таъминотини тўхтатган ва двигателни совутган.

Шунингдек, видеода эшитилган бақир-чақирлар ва эҳтимолий йўловчиларнинг бўлиши ҳақидаги фикрлар асоссиз эканлиги таъкидланган.

Ҳозирда мутахассислар воқеа сабабларини тўлиқ ўрганмоқда. Компания ходимлари профилактик тадбирларни кучайтириш ва бундай ҳолатлар такрорланмаслиги учун тегишли техник чоралар кўрилишини маълум қилган.